248. De sancta Ingride.

1a. Caritatis iacula

Fers, o Christi famula,
Infixa praecordiis;

1b. Viduarum speculum,
Spernis totum saeculum
Currens artis studiis.

2 a. Marthae gestas viscera
Pietatis opera

Impendens pauperibus,

2b. Nec Mariam deseris,
Dum amplecti niteris
Sponsum fletu, precibus.

3 a. Dulce tenes otium
Figens totum studium
In sanctis eloquiis ;

3 b. O sensata femina,
Fortis ad certamina,
Morum micans radiis!

4 a. Foris nigra, squalida,
Intus manens splendida,
Sicut amor dictitat;

4 b. Omnis tua gloria
Aurea cum fimbria
Intra mentem latitat.

5 a. Tu per precum balsamum
Iesum intra thalamum
Tuae mentis allicis.

5 b. Contemplando lectulum
Intrans et in osculum
Te dilecto proicis.

6 a. Pectus tuum nobile
Devotum et stabile
Tria sata similae
Fermentavit ;

6 b. Sunt fides, spes, caritas,
Tribus his te trinitas
Perfectas ad semitas
Sublimavit.

7 a. Iesu sponsa nobilis,
Prudens et laudabilis,
Digna caeli iubilis,
Gloriari,

7 b. Fac nos tuis precibus
Mundatos a sordibus
Angelorum coetibus
Gratulari.