249. De ss. Innocentibus.

1 a. Exsultent omnes parvuli,
Exaltent vocem singuli
Praeclara melodia,

1b. Dulces tonos nunc intonent,
Concordes sonos insonent
Moveant tripudia.

2 a. Cum sit festum hoc maiorum,

Proprium est puerorum

Ratione martyrum,

2 b. Qui perempti sunt lactentes,
Digni Deo innocentes,
Primitiae martyrum.

3 a. Nam timens regnum perdere,
Illos decrevit perdere
Herodis insania;

3 b. Saevit, trucidat misere
Et tenellos ab ubere
Rapit manus impia;

4 a. Bethlehem et in finibus
Bimos et infra sinibus
Matrum necat teneros,

4 b. Iesum quaerens extinguere,
Quem nequivit attingere
Miser super miseros.

5 a. Hos plorat nec consolatur
In Bama, sic prophetatur,
Suos Rachel filios.

5 b. Hi semper agnum sequuntur

Et Deo plene fruuntur

Inter omnes alios.

6 a. Ut Iohannes attestatur
Et in suis scriptis fatur,
Novum cantant canticum ;

6 b. Ipsi clamant sub altari

Sanguinemque vindicari

Suum petunt unicum.

7 a. Hi sunt incoinquinati,
Prorsus incontaminati,
Carne, mente virgines.

7 b. Vos, qui puris puriores,
Mundis estis mundiores,
Nos immundi homines,

8 a. Ab immundo mundi mundo,
Facite, quod corde mundo
Vestris sanctis precibus

8 b. Trinitatem contemplemur
Et in ea gloriemur
In supernis sedibus.