244. (134.) Planctus Dinae, filiae Iacob.

1 a. Abrahae proles,
Israel nata,
Patriarcharum
sanguine clara.

1b. Incircumcisi
viri rapina,
Hominis spurci
facta sum praeda,

1 c. Generis sancti

macula summa,
Plebis adversae
ludis illusa.

R,. Vae mihi miserae,
Per memet proditael

2 a. Quid alienigenas

Iuvabat me cernere?
Quam male sum cognita
Volens has cognoscere!.

R. Vae mihi miserae,
Per memet proditae!

2 b. Sichem, in exitium
Nate tui generis,
Nostris in opprobrium
Perpes facte posteris,

R. Vae tibi misero,
Per temet perdito I

2 c. Frustra circumcisio

Fecit te proselytum,
Non valens infamiae
Tollere praeputium;

E. Vae tibi misero,
Per temet perdito !

3 a. Coactus me rapere
Mea raptus specie,

3 b. Quovis expers veniae
Non fuisses iudice.

4 a. Non sic fratres censuistis
Simeon et Levi,

4 b. In eodem facto nimis
Crudeles et pii.

5 a. Innocentes coaequastis
In poena nocenti,

5 b. Quin et patrem perturbastis
Ob hoc exsecrandi.

6 a. Amoris impulsio,
Culpae satisfactio

6 b. Quovis sunt iudicio
Culpae diminutio.

7 a. Levis aetas iuvenilis
Minusque discreta
Ferre minus a discretis
Debuit in poena.

7 b. Ira fratrum ex honore
Fuit lenienda,
Quem his fecit princeps terrae
Ducta peregrina.

8 a. Vae mihi,
Vae tibi,
Miserande
Iuvenis !

8 b. In stragem
Communem
Gentis tantae
Concidis.