Sermo V .

Item, sermo fratris Bonaventurae in Conventu Narbonensi.

Dominus in caelo paravit sedem suam, et regnum ipsius omnibus dominabitur, Psalmus .

In verbis his explicat sacer David materiam praesentis solemnitatis. Sed quia ascensio dicit motum, et motus terminum, ideo describit eam quoad terminum excellentem, ibi: In caelo; quoad terminum permanentem, ibi: paravit sedem suam: quoad terminum efficacem, ibi: et regnum ipsius omnibus dominabitur.

Dominus ergo in caelo etc. Per caelum autem, quod quidem est sublime sicut sublimis situs, intelligitur Christi excellentiae altitudo: Proverbiorum vigesimo quinto : Caelum sursum et terra deorsum,

et cor regum inscrutabile. Multiformis ornatus intelligitur Christi gloriae pulcritudo ; Ecclesiastici quadragesimo tertio : Species caeli gloria stellarum.

Regularis incessus intelligitur Christi hierarchiae ordinatio ; Iob trigesimo octavo: Nunquid nosti ordinem caeli etc.

Indefectibilis influxus intelligitur Christi gratiae plenitudo: Psalmus: Qui operit caelum nubibus et parat terrae pluviam.

Paravit autem Pater Filio sedem sicut regi ad sublimiter praesidendum ; Isaiae sexto : Vidi Dominum sedentem super solium excelsum et elevatum. - Sicut magistro ad fontaliter docendum: Sapientiae nono: Da mihi, Domine, sedium tuarum assistricem sapientiam.

Sicut iudici ad iuste remunerandum ; Psalmus: Sedes tua, Deus, in saeculum saeculi, virga directionis virga regni tui.

Sicut pontifici ad liberaliter influendum ; Apocalypsis ultimo : Ostendit mihi fluvium aquae vitae etc, procedentem de sede Dei et Agni.

Qui ergo cum Christo vult sibi parare sedem in caelo paret sibi sedem regalem per humilitatis perfectionem; Apocalypsis tertio : Qui vicerit, dabo ei sedere mecum in throno meo. Humilitas autem habet hos gradus: spernere mundum, spernere nullum, spernere se ipsum, spernere, se sperni, gaudere se spretum .

Magistralem per veritatis amorem: Marci ultimo : Postquam loculus est eis, assumtus est in caelum et sedet a dextris Dei.

Iudicialem per iustitiae rectitudinem; Psalmus: Iustitia et iudicium praeparatio sedis tuae.

Pontificalem per misericordiae pietatem: Apocalypsis quarto : Vidi sedentem et in circuitu sedis sedilia viginti quatuor et super thronos viginti quatuor seniores, Patres veteris et novi Testamenti, qui fuerunt viri misericordiae .

Sermo VI . Item, sermo fratris Bonaventurae in Capitulo Parisius.

Non est vestrum nosse tempora vel momenta, quae Pater posuit in sua potestate, sed accipietis virtutem supervenientis Spiritus sancti in vos et eritis mihi testes in Ierusalem, Actuum primo .

In his verbis Salvator curiosos docet omnem perfectitudinis formam, scilicet quid praecavendum

quantum ad cognitivam, cum dicit: Non est vestrum nosse tempora vel momenta, quae Pater etc.: quasi dicat: temporum varietates et successiones inquirere est alienum a professione evangelica et ultra inquisitionem humanam. - Quid praeoptandum quantum ad affectivam, cum subdit: sed accipietis virtutem supervenientis Spiritus sancti in vos. -Quid prosequendum quantum ad operativam, cum addit: et eritis mihi testes.

Dicit ergo: Non est vestrum nosse tempora vel momenta, id est, temporales possessiones investigare, sed desideria vestra in aeternitatem transferre: Matthaei sexto : Primum quaerite regnum Dei et iustitiam eius, et haec omnia adiicientur vobis.

Carnales descensiones quaerere, sed vota vestra in Spiritus sancti iucunditatem transferre: ad Galatas quinto: Spiritu ambulate, et desideria carnis non perficietis.

Honores et exaltationes ambire, sed solatia vestra in crucis acerbitatem terminare: Matthaei vigesimo: Scitis, quia principes gentium dominantur eorum etc. Vos autem non sic, sed qui maior est in vobis fiat sicut minor.

Sequitur: sed accipietis virtutem supervenientis Spiritus sancti in vos, cuius quidem Spiritus est rectificare iudicativam per amorem paupertatis praecelsae; Psalmus : Spiritum rectum innova in visceribus meis.

Sanctificari affectivam per nitorem castitatis integrae; Ezechielis trigesimo sexto: Dabo vobis cor novum et spiritum novum ponam in medio vestri.

Corroborare operativam per pudorem humilitatis profundae; Psalmus: Auferes spiritum eorum, et deficient et in pulverem suum revertentur. Emittes Spiritum tuum, et creabuntur, et renovabis faciem terrae.