252. De s. Iohanne Baptista.

1 a. Praecursorem summi regis
Et praeconem novae legis
Celebrat ecclesia.

1b. In hac luce tam festiva
Gaude, mater, et votiva
Deprome praeconia.

2 a. En, baptista, sanctitatis
Decus, praeco novitatis,
Prodit, res miraculi ;

2 b. Verbum praeit veritatis
Vox aeternae claritatis,
Solem iubar saeculi.

3 a. Insignis spectaculi
Forma, norma populi,
Iohannes monstratur ;

3 b. Vitae praefert gratiam
Et ad paenitentiam
Populos hortatur.

4 a. Hic est novus praedicator,
Viae novae praeparator
Ad virtutum culmina ;

4 b. Diem pandit ultionis
Et perversae nationis
Detestatur crimina.

5 a. Fructum mater insperatum
Cepit, dum concepit natum
In sterili corpore ;

5 b. Usum linguae, dum non cre-
dit,
Pater perdit, ipsi redit
Nato dato tempore.

6 a. Felix, qui iam gaudia
Salutis praenuntia
Ferens declaratur;

6 b. Orbem replet lumine
Omni maior homine
Nato praedicator.

7 a. Lumen adhuc occultatum
Reveretur incarnatum
Verbum patris omnium ;

7 b. Dum Maria salutare
Verbum dedit, exsultare
Coepit infans nimium.

8 a. O quam pium fert amorem
Omnem superans dulcorem
Virginis praesentia!

8 b. Sese matres amplexantur,
Per salutes revelantur
Salutis mysteria.

9 a. Laudes ergo mirifico
Iohanni permagnifico !
Vox amoena

9 b. Psallat eius praeconia,
Laudans petat suffragia
Plebs egena.

10 a. Et tu caeli regione,

Virgo, martyr, doctor bone,
Clementer expostula

10 b. In conspectu summi regis
Professores sacrae legis
Regnare per saecula.