QUAESTIO II.

Utrum opponantur relative ?

Vide relatos quaestione proxime praecedente.

Quod non, quia relativa sunt simul natura: sed actus simpliciter est prior potentia tripliciter 9. Metaph. cap. 7. ergo, etc. Item, unum opponitur tantum relative uni, sed non tantum actui uni opponitur potentia una, vel e converso, quia eadem est potentia contrariorum actuum. Unde in 10. cap. 4. Contraria sunt, quae sunt sub eadem potentia. Et in isto 9. cap. 7. Omnis potentia simul contradictionis est. Item, correlativa opponuntur relative, sed potentia passiva non refertur correlative ad potentiam activam: ergo non refertur, nec opponitur relative potentia actui. Item, relativa non sunt primae differentiae entis, sed actus et potentia sunt hujusmodi; ergo, etc. Item, confirmatur ratio, quia quae sunt determinati generis, non possunt dividere ens inquantum ens, sed relativa sunt determinati generis: ergo potentia et actus, quae primo dividunt ens, non possunt opponi relative.

Contra, de ratione oppositorum relative est, quod unum definiatur per aliud, et hoc non convenit in aliis oppositis: sed actus et potentia sunt hujusmodi, ut patet 9. Metaph. cap. 7. ergo, etc.