QUAESTIO CXLV.

Utrum ei conveniat esse matrem omnium?

Nunc restat videre de illo privilegio, secundum quod beatissima Virgo dicitur mater omnium, Quaeritur, utrum,illud ei conveniat ?

Et videtur, quod non :

1. Filii enim tempore non praecedunt matrem : sed multi tempore praecedebant

Virginem Mariam: ergo non est mater omnium.

2. Item, Cum generatio sit ingressus in esse, et cum tantum triplex sit esse, scilicet naturae, gratiae, et gloriae, beata Virgo non est mater omnium secundum esse naturae: quia plurimi praecesserunt eam secundum esse naturae. Item, Nec secundum esse gratiae : quia multi habuerunt gratiam antequam ipsa. Item, Eadem ratione nec secundum esse gloriae : quia multi Angeli et homines habuerunt esse gloriae antequam ipsa. Item, Si ipsa est mater per fidem: sed sunt multi qui numquam habuerunt vel habebunt fidem : ergo non mater omnium hominum. Item, Videtur quod non sit mater corporalium : quia corporalia non habent esse gratiae : ergo non potest esse mater illorum in esse gratiae. Et sic constat, quod nec in esse gratiae, gloriae, vel naturae. Item, Animatum non proprie generat inanimatum. Item, Corporalia non habent fidem : ergo non est mater omnium istorum.

3. Item, Videtur quod nec mater omnium Angelorum: illi enim semper luerunt in gloria: ergo nihil receperunt ab ipsa. Item, Angeli non sunt recreati: ipsa autem est mater per recreationem : ergo non est mater eorum. Item, Ipsa est mater per fidem : sed in Angelis non est fides : ergo non est mater Angelorum. Item, Quorumcumque ipsa est mater illorum Christus est frater : sed Angelorum Christus non est frater: ergo ipsa non est Angelorum mater.

In contrarium objicitur:

1. Quod sit mater omnium: nam, Luc. ii, 7 : Peperit filium suum primogenitum. Ergo habuit secundo genitum : et constat, quod non corporaliter : ergo spiritualiter: sed generatio spiritualis una est omnium : ergo ipsa est mater omnium spiritualiter.

2. Item, Ad Hebr. II, 11 : Filius ejus non confunditur fratres eos vocare, sicut dicitur, ad Roman. viii, 29: Ut sit ipse primogenitus in multis fratribus. g enes. xxxvii, 27 : Frater enim et caro nostra est. Sed ipsa est mater omnium suorum fratrum. Ergo ipsa est mater omnium hominum.

3. ltem,Isa. lxvi,8: Numquid parturiet terra in die una, aut parietur gens simul? Constat autem quod non quaerit de terra secundum litteram : quia stulta esset quaestio : ergo intelligitur de terra secundum figuram : sed terra secundum figuram est beatissima Virgo : ergo ipsa pariet simul omnem gentem : ergo ipsa est mater omnium hominum.

4. Item, Marci, XI, 9 : Et qui praeibant et qui sequebantur clamabant, dicentes : Hosanna, scilicet filio David. Dicit Augustinus, quod omnes sive praecederent, sive sequerentur incarnationem, salvabantur per fidem mediatoris Dei et hominum : ''sed ad illam fidem necessario exigitur explicite vel implicite credere Deum incarnatum de Virgine : ergo per hoc regeneratio universalis : ergo fides incarnati de Virgine est, per quod est regneratio facta in esse gloriae omnium hominum.

5. Item, Quod ipsa sit mater corporalium, sic probatur: Ipsa est mater innovationis corporalium juxta illud Apostoli, ad Roman. viii, 22 : Omnis creatura ingemiscit et parturit usque adhuc, quia revelationem filiorum Dei exspectat : ergo ipsa est mater in esse innovationis omnium corporalium: quoniam omnis creatura renovabitur per ipsam, et liberabitur a servitute corruptionis in libertatem filiorum.

6. Item, Quod sit mater omnium, videtur : quoniam omnium bonorum mater est .

7. Item, Ipsa est mater graetiae : sed per gratiam datur esse gratuitum et gloriosum : ergo ipsa est mater omnium bonorum bonitate gratiae et gloriae.

8. Item, De ipsa appropriate legitur : Cum eo eram cuncta componens . Et tunc Dominus possedit me in initio viarum suarum . Item, Eccli. XXIV, 5 : Primogenita ante omnem creaturam. Ex his

videtur, quod ipsa est mater omnium, et prior omnibus, et origo omnium.

9. Item, Bernardus: ((Merito, o Domina, in te respiciunt oculi universae creaturae, in qua et ex qua benignissima manus Dei quidquid creaverat, recreavit. "

10. Item, Ipsa est mater omnium, et Deus Pater est origo omnium : quidquid autem per se origo et causa causae est, per se est origo et causa causati: sed ipsa est mater ejus qui est causa et origo omnium : ergo ipsa per se est mater omnium.

11. Item, Angeli accipiunt a Domino Jesu illuminationem, perfectionem, beatitudinem : ipse enim est in quem desiderant prospicere , ''et per quem omnia restaurantur in caelo et in terra . Ergo et Angeli recipiunt quoddam esse gloriae a beatissima Virgine: ergo ipsorum est mater in esse gloriae.

12. Item, Ipsa est gratiae mater: sed gratia generat gloriam : ergo ipsa est mater gloriae : ergo ipsa est mater omnium quae sunt in caelo secundum esse gloriae : ergo ipsa est mater Angelorum.

Ad haec dicimus respondendo, quod beatissima Virgo omnium bonorum mater est. Sed mater respectu filii quatuor habet proprietates, quae sunt genitura, cura, prioritas, dignitas. Respectu alicujus habet omnes istas proprietates, et respectu alicujus aliquas et non omnes, et secundum magis et minus dicitur proprie omnium hominum mater. Item,

Mater est secundum omnes proprietates maternitatis. Genitura : quia unum hominem genuit, in quo omnes regeneravit: et hoc est quod peperit filium suum primogenitum. Item, Mater nostra est cura: quia in uno nobis genuit quidquid ad hanc vitam vel futuram necessarium nobis fuit: unde dicit : A generationibus meis implemini . Item, Quae proprio Filio suo non pepercit, sed pro nobis omnibus tradidit illum, quomodo non etiam cum illo omnia nobis donavit ? Item Ipsa est mater nostra prioritate : quia ipsa est primogenita ante omnem creaturam . Ipsa est mater dignitate praedestinationis : ipsa enim ante saecula praedestinata est, ut esset principium ex quo recreandum fuit omne creatum. Et secundum hoc loquuntur istae auctoritates. Proverb. VIII, 15 : Dominus possedit me, etc, secundum quod de ipsa exponuntur.

Angelorum quoque mater dici potest genitura : quia generavit patrem Angelorum et restauratorem eorum. Similiter et corporalium mater genitura: quia genuit ipsorum innovatorem. Est etiam prior ipsis prioritate praedestinationis et dignitate praelationis. Item, universaliter : quia mater est creatoris omnium : ergo mater omnium creaturarum est. Et imo etiam, ut patet consideranti, mater est omnium dignitate.

Et sic patet qualiter proprium privilegium est beatissimae Virginis, quoniam omnium bonorum mater est.