Sermo IX .

Ascendet, pandens iter ante eos, Michaeae secundo .

In verbis istis breviter comprehendit Propheta mysterium solemnitatis hodiernae quantum ad duo, quorum primum est exaltatio humanae naturae, quae tangitur, cum dicitur: Ascendet. Secundum est apertio caelestis ianuas, cum dicitur: pandens iter etc.

I. Dicit ergo ascendet, sed non solum ipse, sed et alii post eum, quod notatur, -cum additur: ante eos. Ascendit autem ante eos ad dirigendum, ad animandum, ad adiuvandum et ad hospitium praeparandum. Dirigit deliberantes, ut recte videant: animat aggredientes, ut incipere audeant: adiuvat operantes, ut consummare valeant: hospitium parat perseverantibus, ut in aeterna beatitudine gaudeant.

Ascendit ergo ante eos ad dirigendum vel docendum viam, ut hic dicitur: Ascendet, ante eos pandens, id est ostendens, iter. Nesciebatur enim, antequam ipse praecederet nos, via vitae; sed ipse notas fecit nobis vias vitae , scilicet iustitiam, misericordiam , veritatem, quibus itineribus pervenitur ad vitam, sicut dicit Augustinus in sermone de resurrectione ; Exodi decimo tertio: Dominus autem praccedebat eos ad ostendendam viam, per diem in columna nubis et per noctem in columna ignis, ut dux esset itineris iuroque tempore. Nota: ipse praecessit sicut ille qui portat cereum de nocte coram magnatibus.

Ascendit autem ante eos ad animandum, quod significatum est Exodi trigesimo tertio : Si non tu ipse praecedas, ne educas nos de loco isto etc. Via enim erat mala et vadus profundus, et ideo praecessit quasi tentator vadorurn. Oportebat enim transire per torrentem passionum, quod non erat satis tutum. Nota figuram huius primi Machabaeorum quinto, quod dixit Timotheus de Iuda: Cum appropinquaverit Iudas et exercitus eius ad torrentem aquae etc:

sequitur autem, quod transfretavit Iudas et omnis populus post eum, et contritae sunt omnes gentes.

Ascendit iterum ante eos ad adiuvandum, sicut solent peregrini, qui fortiores sunt, praecedere alios ultra fossatum et extendere eis marius ad adiuvandum: Deuteronomii trigesimo tertio : Ascensor caeli auxiliator tuus: Osee undecimo: Ego quasi nutritius Ephraim, portabam eos in brachiis meis: h oc modo, ut dictum est, extendit manum Petro, cum coepisset mergi.

Ascendit iterum ante eos ad hospitium praeparandum ; Ioannis decimo quarto : Vado parare vobis locum: in eodem : Et si abiero et praeparavero vobis locum, iterum venio et accipiam vos ad me ipsum, ut, ubi sum ego, et vos sitis etc. - Ascendit ergo propter haec quatuor ante eos, quorum primum fecit in conversatione, secundum in passione, tertium in resurrectione, quartum in ascensione. Propter primum debemus, esse sapientes in eligendo: propter secundum, audaces in aggrediendo: propter tertium, viriles in prosequendo: propter quartum, avidi in consummando, ut possimus, consummatis laboribus, ingredi hospitium illud, quod nobis est paratum, in quo et omnia bona nobis parata sunt: Matthaei vigesimo secundo : Omnia parata sunt etc.

II. Ideo festinandum ingredi , maxime, cum videmus, hodie ianuam aperiri et tot intrare ad festum. Nota de euntibus ad prandium. Sed quoniam non omnibus pulsantibus ad ostium conceditur ingressus in regnum: Matthaei septimo: Non omnis, qui dicit mihi: Domine, Domine, intrabit in regnum caelorum; ideo providendum est nobis, ut tales simus, quibus concedatur ingressus post Dominum, qui hodie ascendit, pandens iter ante populum suum.

Faciamus, ut agnoscamur esse de familia eius vel de populo eius, quia non repellet Dominus plebem suam . Agnoscitur autem aliquis esse de familia alicuius divitis aliquando, quia nominat se ex parte illius: aliquando, quia, portat litteras eius: aliquando, quia associat eum: aliquando, quia indutus est vestibus eiusdem panni cum eo. Quorum primum significat confessionem fidei laicorum: secundum, sapientiam clericorum: tertium, solitudinem Religiosorum: quartum, imitationem perfectorum.

Quidam ergo recognoscuntur a Domino et recipiuntur in eius hospitio, quia nominant se ex parte illius: Lucae duodecimo : Omnis, quicumque confessus fuerit me coram hominibus, et Filius hominis confitebitur illum coram Angelis Dei. Sed attende, quia saepe nominans se .ex parte alicuius ignoratur, nisi habeat insignia. Insignia autem fidei sunt opera: Iacobi secundo: Quid proderit, fratres mei, si fidem quis dicat se habere, opera autem non habeat 1 quasi dicat: non: non enim habet insignia: ad Titum primo: Confitentur, se nosse Deum, factis autem negant. Exemplum de clerico, a quo requisitum est: ubi sunt opera tua?

Quidam recipiuntur, quia portant litteras domini, sine quibus non recipiuntur clerici: Osee quarto : Quia tu scientiam repulisti, repellam te, ne sacerdotio fungaris mihi: idem Baruch quarto . Nota de his: Timotheus, cui dicitur : Ab infantia sacras litteras nosti. Exemplum de Hieronymo. Et nota, quod in litteris oportet esse sigillum caritatis, aliter non sunt verae; Canticorum octavo: Pone me ut signaculum super cor tuum, ut signaculum super brachium tuum. Nota ibi sigillum, et econtra, quod hoc sigillum non habent hypocritae, qui sunt falsarii poenitentiae. Et nota, qualiter contingit hoc reperire in illis.

Quidam recipiuntur, quia manent cum eo et sunt de eius societate, sicut qui omnia pro Christo reliquerunt, de quibus Lucae vigesimo secundo: Vos estis, qui permansistis mecum in tentationibus meis: et ego dispono vobis, sicut disposuit mihi Pater meus, regnum etc.: et Ioannis duodecimo : Si quis mihi ministrat, me sequatur: de illo sequitur, de quo dicitur: Vade, vende quae habes etc., et veni, sequere me etc., et ubi sum ego, illic et minister metis erit.

Quidam recipiuntur, quia sunt similes ad vestes eius, et istis oportet habere maiorem honorem, et isti sunt imitatores passionis eius: quod pertinet ad perfectos, de quibus Apocalypsis ultimo : Beati, qui lavant stolas suas in sanguine Agni, ut sit potestas eorum in ligno vitae, et per portae intrent in civitatem.

Nota, quomodo omnes induti sumus eodem panno cum illo, sed non omnes Ungimur eodem colore cum illo. - Ingrediuntur ergo post eum laici fideliter confitentes, clerici veraciter praedicantes, Religiosi assidue comitantes, perfecti passionem eius viriliter imitantes. Quod nobis concedat etc. Amen.