256.

1. Crebro da mihi basia,
Cingant me quoque brachia,
Cujus pascar ad ubera.

2. Amica, jam egredere,
Mecum cuba meridie
Sub tegumento vineae.

3. Hortum perflate, zephyri,
Hortum odoris optimi

4. Requiesces in vinea,
Gradieris per balsama,
Ubi fluunt aromata.

5. Dilecte mi, quem elegi,
Similis esto leoni,
Fortis in umbra Libani.

6. Veni, dilecte mi, veni,
Jam aromata messui.

7. Bonae speciei virgo
Nobis adest de Libano,
Tota fluens cinnamomo.

8. Vestes habet coccineas,
Ecce, praecedet alias
Obfuscatque pulcherrimas.

9. Qui places animae meae,
Ubi pascis meridie,
Ubi te quaeram hodie ?

10. Dum te sponsum desidero,
Erraturam me timeo,
Sola vagans in eremo.

11. Si ignoras, pulcherrima,
Nostra sequi vestigia,
Vade carpendo lilia,

12. Rosas et flores alios,
Si indagare quaeris nos,
Ecce, sum inter accanthos.

13. Adjuro vos, o virgines,
Per balsama et per flores
Et per cervos salientes,

14. Indicate, quem diligo,
Si vidistis in eremo,
Quia amore langueo.

15. Qualis est dilectus tibi,
Quia nos sic adjurasti,
Nulla hic est forma?

16. Procede, formosissima,
Loca sunt hic uberrima,
Quem quaeris adsum in ulva.

17. Fuge, dilecte mi, fuge,
Assimilare capreae,
Conveniamus vespere.

18. Fuge, jam fuge, caprea,
Mea dilexit ubera,
Qui pascitur per lilia.

19. Parvulas vulpes capite
Vellentes sepes vineae,
Ingredi sic prohibite.