QUAESTIO CXLVIII. Utrum communicaverit passioni Filii?

Post haec quaeritur de privilegio quod est communicatio passionis.

Et videtur secundum quod exponitur primo, quod

i. Non fuerit ei passio communicata per illud Isaiae, lxiii, 3 : Torcular calcavi solus, et de gentibus non est vir mecum. Glossa : " Tormenta sustinui. " Item, Glossa : " Solus Samson praecisis crinibus fuit , etc. " Nec Angelus, nec Archangelus, nec quilibet caelestis spiritus, denique humani generis nullus,vel Gentilis, vel Judaeus, sed solus Deus pugnat et superat: ergo nulli est passio comm.unicata.

2. Item, Omnes alii sunt in statu salvandorum et redimendorum : ipse solus redemptor et salvator : sed ad redemptionem passio pertinet : ergo ipse solus fuit passus.

3. Item, In immolatione Isaac et omnibus aliis figuris passionis, numquam figuratur sub participatione plurium : ergo et in figurato tantum debet esse passus unus pro omnibus.

4. Item, Psal. cxl, 10 : Singulariter sum ego, donec transeam. Et sic videtur, quod communicatio passionis non est privilegium beatissimae Virginis: eo quod non fuit communicata alicui creaturae.

E converso videtur, quod non possit esse privilegium beatissimae Virginis :

1. Eo quod pluribus et non ipsi soli fuerit communicatum : quod probatur per illud Job, XIX, 20 : Pelli meae, consumptis carnibus, adhaesit os meum. Glossa Gregorii : "In osse fortitudo, in carne corporis infirmitas designatur : per os Christus, per carnem discipuli designantur, qui tempore passionis infirmi fuerunt : per pellem quae exterior est, foeminae sanctae designantur, quae exterioribus Deo ministeriis servirunt. Quare igitur consumptis carnibus os Domini adhaesit pelli suae ? quia fortitudo ejus fugientibus se discipulis invenit juxta se mulieres : " ergo non soli Mariae tempore passionis communicata est passio vel fides passionis.

2. Item, Joan. XIX, 25 : Stabant juxta crucem Jesu mater ejus, etc. : ergo ipsa non sola consors passionis.

3. Item, Ibidem, V. 26 et 27 : In cruce dixit Jesus matri suae : Mulier, ecce filius tuus. Deinde dicit discipulo : Ecce mater tua. Hic nota qualiter beatus Joannes honoratur tanto privilegio, ut filius Virginis diceretur, et ut sibi mater Dei committeretur : nec hoc factum fuisset, si non fuisset fidelis servus et prudens, cui committeret Dominus matrem suam. Si autem fidelis, ergo habuit fidem et passionem.

4. Item, Marc. XIV, 51 et 52 : Adolescens quidam sequebatur eum, amictus sindone super nudo : et tenuerunt eum. At ille, rejecta sindone, nudus profugit ab eis. Glossa : " Ab eis, quorum et praesentiam detestabatur et facta, non a Deo, cujus amorem etiam absens corpore fixum servavit in mente. " Sed charitas non est sine fide. Ergo Joannes habuit fidem compassionis.

5. Item, Lazarus fuit nuper suscitatus in anima et corpore, et multa de paenis infernalibus narravit, ut dicit Chrysostomus. De illo igitur qualiter opinabile est, quod tam cito ceciderit a fide. Item, Latro in cruce per veram poenitentiam placuit Deo : sed sine fide impossibile est placere Deo : ergo habuit fidem et compassionem : ergo hoc non est privilegium Dominae nostrae, quod potest etiam latroni convenire. Item, Elias et Henoch qui locuti fuerunt cum Domino in transfiguratione, habuerunt etiam fidem incar nationis et passionis. Item, Joannes Baptista in limbo habuit fidem. Item, Multi absentes quibus Dominus non praedicaverat, ut ille de quo dixit, Matth. viii, 10 : Non inveni tantam fidem in Israel. Et multi alii. Item, Glossa super illud Marci, XIV, 72 : Et coepit flere'': ((Egreditur foras ut ab impiis secretus, negationis culpam liberius abluat fletibus. " Item, Cornelius fidem habuit et praesens non fuit.

Et videtur ex his quod multi tempore passionis habuerunt fidem, et per consequens passionem. Et sic non potest poni privilegium fides passionis vel communicatio passionis.

Sed contra :

1. Si de eo quod magis videtur inesse et non inest, nec de eo quod minus. Sed maxime videbatur de mulieribus, quod habuerunt fidem passionis, ut patet supra per Glossam Gregorii. Et inter mulieres maxime videbatur de Maria Magdalena : sed illa non habuit fidem tunc : ergo nec aliquis nec aliqua earum. Minor patet, Joan.xx, 1: Maria Magdalene venit mane, cum adhuc tenebrae essent, ad monumentum. Chrysostomus : " Quia adhuc fuit in tenebris infidelitatis. " Item, Joan. xx, 13 : Mulier, quid ploras ? G lossa : " Non lacrymas nudas, sed fidem quaere : bonae lacrymae, si Jesum agnoscas. " Et infra, v. 17 : Noli me tangere, nondum enim ascendi ad Patrem meum. G lossa : " Non quod nollet tangi nisi cum ascendisset in coelum, cum et mulieres et alii in terra eum tetigisse legantur et non sedentem in coelo. " Vult igitur sic se spe-

cialiter tangi, id est, sic se credi, ut sit aequalis Patri : et quia ista adhuc in eum carnaliter credebat, quem sicut hominem flebat, audit : Noli me tangere, id est, sic in me credere : quia nondum in corde tuo ascendi ad Patrem meum, id est, nondum credis me esse aequalem Patri : tunc tanges cum me in Patre Deum credes. Item, Quem mortuum credis viventem tangere non mereris.

Ex his patet, quod Magdalena de qua minime videbatur, in passione Domini discredidit et cecidit : ergo et omnes

alii.

2. Item, Matth. XXVI, 31 : Omnes vos scandalum patiemini in me in ista nocte. Glossa : " Praedicit quid passuri sunt, ut post eventum non desperent, sed paenitentia liberentur. " Item, Infra, v. 56 : Discipuli omnes, relicto eo, fugerunt. Item, Petrus qui expressissime fidem fuit protestatus, ter negavit : ergo multo fortius alii. Item, Marci, XIV, 5 : Quidam adolescens amictus sindone. Glossae : " Possumus hunc Joannem fuisse intelligere. " Ergo Joannes fugit. Item, Joan. xx, 4 : Currebant duo simul. Et infra, v. 8 : Tunc ergo introivit et ille discipulus, qui venerat prius ad monumentum: et vidit, et credidit. Et sic patet, quod Joannes non prius credidit. Item, De mulieribus, Bernardus : " Sic vos, o bonae mulieres, cuinam, quaeso, excubias exhibetis ? cui aromata comparatis, paratis unguenta? Si sciretis quantus is sit, quam sit inter mortuos liber , mortuus iste quem vos ungere pergitis, vos forsitan petissetis ab eo ungi. Nonne iste est, quem unxit Deus oleo laetitiae prae consortibus suis ? Beatae eritis vos, si gloriari potueritis revertentes, et dicere, quod de plenitudine ejus accepimus nos omnes '' . Enimvero factum est ita. Nam revera unctae remeant, quae uncturae venerant. Missae ab Angelo opus faciunt Evangelistae, factae Apostolae Apostolo- rum, dum festinant ad annuntiandum mane misericordiam Domini . " Ex his patet, quod mulieres in passione Domini discrediderunt.

3. Item, Quod beatissima Virgo sola tempore passionis permanserit in fide, videtur posse subtiliter inveniri secundum Isaiam, xliii, 3, cum dicit: Torcular calcavi solus, et de gentibus non est vir mecum. Si enim omnes homines voluisset excludere, suffecisset dicere : Calcavi solus : et sic superfluum esset dicere : De gentibus non est vir mecum. Item, sic dixisset potius : De gentibus nullus est mecum. Quando igitur viros exclusit, constat quod aliquam foeminam reliquit, quam non exclusit, quae torcular passionis secum sustinuit et calcavit.

Item, Magis videbatur de mulieribus quam de viris, quod secum calcaverant : quia illae stabant circa crucem : ergo si voluisset omnes excludere, potius debuit eas expressisse de quibus videbatur magis inesse.

Item, Addit Ambrosius : " Stabat juxta crucem, non ut dolorem Filii consideraret, sed ut salutem humani generis exspectaret. " Ergo ipsa sola stabat, et omnes alii et aliae fugerunt corde vel corpore: ergo ipsa sola Domino communicavit in passione fide et compassione.

4. Item, Videtur quod communicatio passionis non debeat poni pro privilegio. Omne enim privilegium aliquod debet importare commodum illi cujus est privilegium : istud autem non videtur importare commodum, sed tormentum.

Item, Liberatio a poena est signum et effectus dilectionis : ergo infligere paenam non est signum dilectionis : ergo non est privilegium.

Contra :

1. Joan, XVII, 11 : Calicem quem dedit mihi Pater, non bibam illum ? Item, Ibidem, XVII, 1 : Pater , clarifica Filium tuum, etc. Item, Ad Philip.I, 29 : Vobis

donatam est pro Christo, non solum ut in eum credatis, sed ut etiam pro illo patiamini. Item, Ad Hebr, XII, 6 : Flagellat Deus omnem filium quem recepit. Item, Jacob. I, 2 : Omne gaudium existimate, fratres mei, cum in tentationes varias incideritis. Item, Act. v, 41 : Ibant Apostoli gaudentes a conspectu consilii , quoniam digni, etc. Ex his igitur patet et manifestum est, quod communicatio passionis est privilegium.

2. Item, Quod, in passione Domini sustinuerit beatiss lma Virgo, patet per Damascenum , qui dicit, quod dolores quos effugit pariens, in Christi passione sustinuit. Luc. II, 35 : Tuam ipsius animam pertransibit gladius. Item, Isa. lxvi, 7 : Antequam parturiret, peperit: antequam veniret partus ejus, peperit masculum. Ex hoc sequitur, quod aliquando peperit sine parturitione et sine dolore. Et post.

modum, v , 8, sequitur I Numquid parturiet terra in die una, aut parietur gens simul, quia parturivit et peperit Sion filios suos ? Ergo aliquando peperit gentem simul, et cum parturitione et dolore : ergo peperit Filium suum primogenitum sine dolore in sua nativitate, postea peperit totam gentem simul in Filii passione, ubi facta fuit ei in adjutorium simile sibi, ubi ipsa mater misericordiae Patrem misericordiarum in summo opere misericordiae adjuvit, et una secum omnes homines regeneravit. Et haec regeneratio cum summo dolore utriusque fuit. Unde Glossa ibi posita : " Multo labore in fide genuit. "

Ex his patet, quod Pater misericordiarum soli matri misericordiae opus summae misericordiae, id est, passionem communicavit .