Sermo II .

Sermo fratris Bonaventurae in die Pentecostes factos Parisius in domo Fratrum Minorum coram multis.

Effundam super domum David et super habitatores Ierusalem spiritum gratiae et precum, et aspicient ad me, quem confixerunt .

Fratres mei, attendenti mihi attente pariter et devote Spiritus sancti desideratam influentiam in hac praeclara die super credentes effusam tam largiter quam potenter, quae in sacra Scriptura praefigurata est multiformiter, scilicet per fluvium paradisum irrigantem , per fontem scaturientem, per fluvium de sede Dei et Agni procedentem, per puteum viventis et videntis me, per puteum aquarum viventium, per ventum vehementem, per ventum ab austro flantem, per auram refrigerantem , per alveum torrentis, per aquas Gedeonis, per cellam vinariam, per cellam pigmentarium. Videtur mihi, quod ista singularis solemnitas tanto venerabiliori affectu et ardentiori studio sit colenda et ruminanda et amplectenda, quanto profundioribus mysteriis exstat insignita. Eapropter, ut de ea ad Dei honorem et nostram consolationem aliquid dicere et audire valeamus, in principio rogabimus Dominum Iesum Christum, lucis aeternae fontem et amoris, fontem decoris, fontem vigoris etc, quatenus etc.

Effundam etc. In his verbis scriptis sacer Propheta, supernaturaliter illustratus, ex persona Dei sive ipsius Domini Iesu Christi declarat nobis Religiosis Spiritus sancti desideratam influentiam quadrupliciter, scilicet ut liberaliter impensam, quia effundam, inquit: ut signanter distributam, quia super domum David et super habitatores Ierusalem: ut deiformiter opulentam, quia spiritum gratiae: ut configuraliter fructuosam, quia et precum: pretium mundi, cum aspicerent ad me, quem confixerunt.

I. Declaratur ergo primo ut mirabiliter largiflua, cum dicitur: Effundam. Est autem istius beatae influentiae diffusio quadriformis digne se disponentibus ad eam exemplo Apostolorum: mundificans per pudicitiam renovantem: Ezechielis trigesimo sexto : Et effundam super vos aquam mundam, et mundabimini ab omnibus inquinamentis vestris etc. Et dabo vobis cor novum et spiritum novum ponam in medio vestri. Dabo vobis cor novum dicit, quia effectus huius infusionis est in castitatis fortitudine collocare et solum ad invisibilem pulcritudinem anhelare. Debet enim erubescere irrationabiles motus homo sicut homo a principatu et dignitate (?). " Dominus enim acceptat amari a mundis ". Accedens vero ad altaris Sacramentum vel eorum qui carnis sunt (?), debet scire ; sicut haec omnia dicit Dionysius de Caelesti Hierarchia et Ecclesiastica, in responsione ad archimandritam.

Clarificans per sapientiam revelantem ; Ioelis secundo : Effundam spiritum meum super omnem carnem, et prophelabunt filii vestri et filiae vestrae etc. Effundam

dicit, quia effectus istius diffusionis est receptio principalis luminis et divini radii superessentialiter casta et incomprehensibilis, secundum Dionysium de Caelesti Hierarchia , - Tertio est restaurant per condescendentiam adimplentem ; Ecclesiastici primo : Ipse creavit illam in Spiritu sancto, videlicet carnem. II. Secundo declaratur ut signanter distributa, cum subdit: super domum David. Per domum David intellige sanctam Religionem; per habitatores Jerusalem intellige fratres digniores influentia Spiritus sancti. Dicitur autem nostra Religio domus David, quia ad instar domus illius divinitus est promota in gratia, dilatata in fama, directa in sapientia, magnificata in potentia et amplificata in frequentia. - Promota in gratia: primi Paralipomenon decimo septimo : Cum sedisset David coram Domino, dixit: Quis ego sum, Domine Deus, et quae domus mea, ut praestares mihi talia?

Dilatata in fama: secundi Regum tertio : David proficiens et semper se ipso robustior, domus autem Saul decrescens quotidie.

Directa in sapientia: secundi Regum septimo : Et domus servi tui David erit stabilita coram Domino, quia tu, Domine exercituum, Deus Israel, revelasti aurem servi tui.

Magnificata in potentia et amplificata in frequentia: secundi Regum septimo: Incipe ergo et benedic domui servi tui, ut sit in sempiternum coram te: quia tu, Domine Deus, loculus es, et benedictione tua benedicetur domus servi tui in sempiternum. Subdit: et super habitatores Ierusalem. Dicimur autem nos habitatores Ierusalem, super quos debet fieri ista infusio propter fulgiditatem intelligentias : secundi Paralipomenon trigesimo quarto : Missi fuerant ad Oldam prophetidem, quae habitabat in Ierusalem in Secunda: et Tobiae decimo tertio: Beatus ero, si fuerint reliquiae seminis mei ad videndam claritatem Ierusalem.

Propter tranquillitatem affectuum placidam: Zachariae decimo tertio: In die illa erit fons patens domui David et habitantibus Ierusalem in ablutionem peccatoris et menstruatae. Sacri enim Moysi facta est diligens anima (?). - Propter unanimitatem sensuum iucundi ; Isaiae quarto : Si abluerit Dominus sordes filiarum Sion etc. ; pax enim Christi est benignitas.

Propter uniformitatem actuum devoti: Actuum secundo: Viri, Iudaei et qui habitatis Ierusalem universi, hoc vobis notum sit, et auribus percipite verba mea.

Propter uniformitatem et pietatem cultuum sive morum: Actuum secundo: Erant in Ierusalem habitantes Iudaei, viri religiosi ex omni natione, quae sub caelo est.

Secundum hoc erant habitatores etc.

III. Tertio loco declaratur ut deiformiter opulenta, cum dicitur: spiritum .gratiae. Effunditur autem super fratres nostros se disponentes in ista solemnitate spiritus gratiae quadriformis, scilicet inflammanlis per seraphica desideria: ad Galatas quarto : Misit Deus Spiritum Filii sui in corda vestra clamantem: Abba, Pater. Itaque iam non est servus, sed Filius: quodsi Filius, et heres per Deum. - Decorantis per luciformia exempla: Iob vigesimo sexto: Spiritus eius ornavit caelos.

Elevantis super spectacula supercaelica ; Ecclesiastici quadragesimo octavo: Spiritu magno vidit ultima et consolatus est lugentes in Sion.

Regulantis per perfectionem evangelicam ; Psalmus. Spiritus tuus bonus deducet me in terram rectam.

IV. Quarto declaratur ut figuraliter salutifera, , cum dicitur: et precum. Effunditur autem super nos spiritus quadriformis precum, scilicet amaricantium per peccati deplorationem ; Psalmus : Exaudivit preces meas et eduxit me de lacu miseriae et de luto faecis.

Precum transformantium per Christi compassionem: Danielis nono : Ab exordio precum tuarum egressus est sermo: ego autem veni, ut indicarem tibi, quia vir desideriorum es: et sequitur revelatio passionis Christi.

Precum inclinantium per proximi condescensionem ; Danielis nono : Cum adhuc loquerer et orarem et confiterer peccata mea et peccata populi mei Israel et prosternerent preces meas in conspectu Dei mei etc., ecce, vir Gabriel, quem videram in visione a principio. - Precum sursum agentium per animi devotionem ; Iob decimo sexto: Cum haberem mundas ad Deum preces .