26). De sancto Karolo Magno.

1 a. Sacra datur sollemnitas,
Et iucunda festivitas
Gaudet cum tripudio.

1b. Primatum gesssit Gallorum,
Turbam ferocem malorum
Subegit imperio.

2 a. Felix partus, felix vita
Mundo fulsit inaudita,
Nascitur rex Franeiae,

2 b. Cuius genitor Pipinus
A virtute nulla minus
Exemplum clementiae.

3 a. Hic Carolus, rex terrenus,
Imperator fit amoenus,
Bellator pro populo.

3 b. Totus erat catholicus,
In sermone veridicus
Manet in periculo.

4 a. Magnanimus imperator,
Exercitus moderator
Multa suis conferebat.

4 b. Et barbaros Saracenos,
Hos a fide alienos,
Baptizari faciebat.

5 a. Rex fateri verebatur,
Pudore confundebatur,
Peccatum relaxatur ;

5 b. Est ab alto carta missa,
In qua regi est dimissa
Offensa, dum precatur.

6 a. O Carole bellicose,
Huius vitae tenebrosae
Timemus pericula;

6 b. Fortes simus in adversis
Nec vincamur a perversis
Per vitae curricula.

7 a. Regnum regno commutatur,
Post agones superatur
Mortis ab imperio,

7 b. Et de regno temporali
Hunc in regno triumphali
Sublimavit solio.

8 a. Ubi non vita mortalis,
Sed ibi vita vitalis,
Ubi reges coronantur.

8 b. Ibi secura requies,
Ibi sine nocte dies,
Ibi duces laureantur.