Sermo IV .

Fluvius egrediebatur de loco voluptatis ad irrigandum paradisum, qui inde dividitur in quatuor capita, Genesis secundo .

Describitur in verbis his Spiritus sancti exuberantia hodierna ut vivida, ut iucunda, ut fructuosa, ut diffusiva sive consummativa.

Propter primum dicitur: Fluvius egrediebatur: propter quod nota, quod comparatur Spiritus sancti hodierna influentia fluvio multiformi, scilicet orienti ad fontem vivum propter sinceritatem puritatis renovantis ; Ecclesiastici vigesimo quarto : Ego quasi fluvii dioryx et sicut aquaeductus exivi de paradiso.

Scaturizanti in altum propter sublimitatem maiestatis nobilitantis ; Danielis septimo: Fluvius igneus rapidusque egrediebatur a facie eius.

Splendenti in profundum propter claritatem veritatis serenantis ; Apocalypsis ultimo : Ostendit mihi fluvium aquae vitae splendidum tanquam crystallum, procedentem de sede Dei et Agni.

Protendenti in longum propter virilitatem longanimitatis attingentis ; Ecclesiastici vigesimo quarto: Factus est mihi trames abundans, et fluvius meus appropinquavit ad mare.

Extendenti in latum propter liberalitatem caritatis communicantis cum Christo: Esther decimo: Parvus fons, qui crevit in fluvium et in lucem solemque conversus est et in aquas plurimas redundavit.

Efficienti fructum temporaneum propter fecunditatem suavitatis degustantis: Genesis secundo : Fluvius Phison: ipse est, qui circuit omnem tetram Hevilat, ubi nascitur aurum: et aurum terrae illius optimum est.

Producenti fructum serotinum propter felicitatem satietatis beatificantis: Genesis secundo: Fluvius autem quartus ipse est Euphrates.