267. De s. Maria Magdalena.

1. O Maria Magdalena,
Prius vas spurcitiae,

Facta virtutum lagena,
Norma paenitentiae,

Ad te clamat plebs egena
Mortalis militiae.

2. Funde preces pro scelestis,

Ut optata venia
Ditentur regis caelestis

Salutari gratia,
Sitque angelorum testis

Pura conscientia.

3. Caritatem fac amare,

Tollere invidiam,
Unitatem conservare,

Fugere discordiam,
Carnis, mundi superare

Et hostis malitiam.

4. Bonam partem elegisti,

Iesum Christum Dominum

Super cuncta dilexisti
Veniamque criminum,

Hinc sanctaram meruisti
Consors esse virginum.

5. Tu soror apostolorum,
Tu decus ecclesiae,

Tu honor praedicatorum,
Tu gemma Provinciae,

Tu purgatrix peccatorum,
Tu lex paenitentiae.

6. Qui te traxit, gloriosus
Pater nunquam genitus,

Qui suscepit, gratiosus
Eius unigenitus,

Qui perduxit, virtuosus
Virtutisque spiritus.

7. Maria, cuius lacrimae

Sordes purgant scelerum,
Electrix partis optimae,

Qua sine fine frueris,
Ad te suspirant animae

Reae delicti veteris,
In hora mortis ultimae

Pia succurre miseris.