265. De s. Katharina Senensi.

1 a. Pape, papa, pater patrum,
Canonizat votis fratrum
Vere magnam,
Sicut agnam,
Katharinam virginem,

1b. In apostolorum festis
Huius piae Pius testis
Memorandus,
Venerandus

Super omnem hominem.

2 a. Virgo sancta Katharina,
Nata Senis, ad divina
Deo digna
Et benigna

Sublimari meruit.

2 b. Salutando pie piam

Virgo virginem Mariam
Haec divina
Katharina

Gratiose floruit.

3 a. Eam Iesus adoptavit,
Pro diversis informavit
Apparendo
Resplendendo

Admiranda gratia.

3 b. A primaeva iuventute
Vias ivit viae tutae
Ut Maria,
Virgo pia,

Castitate praevia.

4 a. Magna cum devotione
Fervens in oratione,
Cum descendit
Vel ascendit,
Fulsit in septennio.

4 b. Carni volens repugnare,
Carnem nolens manducare,
Saepe flebat
Et ardebat

Christi desiderio.

5 a. Animarum zelo tracta
Mira perpetrabat facta
Claris verbis
Non acerbis

Monens perfectissime.

5 b. Non volebat consolari,
Donec et depauperari
Diligentes
Se parentes

Suos vidit maxime.

6 a. Oboedire satagebat,

Christum sequi cupiebat
Servans vota
Tria nota

Haec ancilla Domini.

6 b. Nec eandem fatigabant

Temptamenta, quae vexabant
Hanc divinam
Katharinam,

Gratam Iesu nomini.

7 a. Igne non comburebatur,
Quamvis uri videbatur,
Mente rapta
Velut capta,

Sponsus sponsam medi-
cans.

7 b. Saepe Iesus apparebat
Et occulta referebat
Gratiose
Et formose

Quasi sponsam suscitans.

8 a. Annis actis ter undenis
Haec virguncula de Senis
Invitatur,
Coronatur,

Ad aeternam gloriam.

8 b. Vulnerata caritate

Stigmata portabat grate
Puro corde,
Sine sorde

Faciens memoriam.

9 a. Iesus, sponsus gloriosus,
Sponsae suae gratiosus,
Sociatam
Sibi gratam

Cyclade hanc induit.

9 b. Trahe, singuli clamemus
Et eandem honoremus
Bona vita
Recensita,

Quam dilectam voluit.