267. De sancto Lamberto.

1 a. Martyris egregia
Lamberti praeconia
Recolat ecclesia,

1b Qui pro Christi nomine
Sacro fuso sanguine
Sacrat haec sollemnia.

2 a. Martyrumque contio
Martyris consortio
In caelesti curia,

2 b. Ubi non sunt annua,
Sed festa continua,
Concelebret gaudia.

3 a. Nam stola laetitiae,
Corona iustitiae
Et honoris gloria

3 b. Ornavit antistitem,
Immo suum militem,
Summi regis gratia.

4 a. Clarus hic parentibus,
Sed clarior moribus,
Altus domo regia,

4 b. Datus a primordiis
Literarum studiis
Claruit scientia.

5 a. Fonte sancti precibus
Manante sudantibus
Datur potus copia.

5 b. Prunis eius pallium,

Quas claudebat gremium,
Non sensit incendia.

6 a. Hic vita laudabilis,
Gratus et amabilis,
Pollens per miracula,

6 b. Cunctis acclamantibus
Praefertue Tungrensibus
Praesulatus infula.

7 a. Qui florens ut lilium,
Dans virtutum omnium
Fructum in ecclesia,

7 b. Clara lampas micuit,
Sortitus, ut patuit,
Nominis praesagia.

8 a. Lucerna cum radio
Non submissa modio,
Sita supra culmina,

8 b. Texandriae gentibus
Illuxit errantibus

Viae pandens lumina.

9 a. Dum Pipinum arguit,

Quem pelex innexuit

Non legali copula,

9 b. Molitur insidias
Altera Herodias,
Ut Iohannis aemula.

10 a. Cum orandi studio
Esset in Leodio
Sua clausus cellula,

10 b. Dodonis satellitum,
Immo Satan comitum
Assunt conventicula.

11a. Hunc crucis signaculum
Testans Dei famulum
Cellae dat indicia;

11b. Quem transfigens missili,
Se noxa difficili,
Necat manus impia.

12 a. Iam manante sanguine
Cum roseo flumine
Mox anima splendida

12 b. Iungitur martyribus
In caelo vernantibus
Laurea praefulgida.

13 a. Huius patrociniis

Nos mundos a vitiis
Divina clementia.

13 b. Cum supernis civibus
Iungat in caelestibus
Saecula per omnia.