267.

1. O Jesse virgula,

O summi regis cellula,
O trinitatis gerula,
O caritatis vas,
Ex te illuxit claritas, .
In te quievit deitas,
Dum Gabriel nuntiavit
Tibi, mater mox concepisti
Nostrae salutis pretium,
Salvatorem omnium ;
Quem agmina coelestia
Collaudant et terrestria,
Tu, virgo, concepisti,
Cui concinunt angeli,
Collaudant et archangeli,

Tu, virgo, peperisti
Et trinitatis

rosa permansisti.

2. Pannis involvitur,

Per quem peccatum solvitur,
De quo in psalmis legitur
Nascente Domino,
Regnante sine termino,
Sedente in summo throno.
Reges de Saba veniunt,
Aurum, thus, myrrham offerunt,
Hic jacet matris gremio
Regnans in summo solio.
Cognovit bos et asinus,
Quod puer erat Dominus

Natus deitatis ;
Hic jacet in praesepio,
Dei patris imperio,
Decus virginitatis
Atque creator
omnis bonitatis.

3. Nunc, virgo virginum,
Implora tuum filium
Et fac nobis propitium,

Ut tuis precibus

Abstractis cunctis nexibus

Regnemus in coelestibus.
Per tua sancta gaudia
Esto nobis propitia
Et planctum, quem sustinuisti
In hora mortis Christi ;
Succurre nobis miseris,
Cum dies instat flebilis
Et dirae mortis hora,
Spem caritatem fidemque
Nobis clementer tribue,

Virgo mater decora,
Suppliciter pro

nobis Christum ora.