269.

1, Salve, coeli porta,
Davidis exorta

Regina progenie,
Nos te laudantes respice,
Non ob reatum despice,

Es quia spes veniae.
Evae lapsum revocas,
Dum Christi te reddis vas,

Regem fovens in gremio.
Qui venit infans, pascitur
Et homo verus nascitur

Abs virili commercio.
Audi nos, coeli ros,
Fac, nos ut suppliciis
Remotis atque vitiis
Digne te laudare
Semper et amare.

Valeamus.

2. Ave, salutis via,
Per te nobis, pia,

Nascitur salvatio,
Nos captivatos redimens,
Ab inferno redigens

Gentis exspectatio.
Ejus virgo facie
Stans firmiter in acie

Da frui cum laetitia
Et devictis hostibus
Tuis, adjutrix, precibus

Tolle necis supplicia.
Audi nos, florum flos,
O summa spes humilium,
Placa tuum filium,
Ut hostis saevi jacula
Vitare sine macula

Valeamus.

3. Eja, templum Salomonis,
Vellus Gedeonis,

Facie glorifica,
Nos te canentes erige
De carcere miseriae,

Specie mirifica,
Jesse radix, coelice
Condignam et angelice

Laudis te profitemur.
Respice nos oculo
Pio, fac vini.poculo

Fontis ut satiemur,
Audi nos, mundi dos,
Haec vera res memoria,
Sic collocet in gloria,
Vultum ut optatum
Cernere beatum

Valeamus.