274. De sancto Matthaeo.

1. Pretiose virtutum flos,
Matthaee, nunc respice nos,

Qui mundana reliquisti;
Rex caelestis te vocavit
Et te sibi sociavit

Mox ei adhaesisti.

2. Orbis taxas reliquisti,
Quod a Christo didicisti

Beatum evangelium ;
Cultu Aethiopes verae
Fidei atque sincerae

Trahis ornans ad Dominum.

3. O pie evangelista,
Quanta fulsisti in ista

Valle vitae sanctitate,
Pellens ritum profanorum,
Gentes ad regnum caelorum

Convertens in veritate!

4. Infirmorum tu solamen,
Pro fide Christi certamen

Adisti dum sanctissimum,
Victor effectus tyranni,
Ad cenam vocatus agni,

Regnum intrans altissimum.

5. Superno gaudens de throno,
Fine conservatos bono

Perduc nos ad caelestia.
Fac, ut tibi collaetemur
Pariterque iucundemur

Per saeculorum saecula.