275. De sancto Mauritio.

1. Ave, clarissima sanctorum
Turma Thebaeorum,
Quam morum
Honestas
Ac divina maiestas

Venustavit.
Normam vos militum servastis,
Rapinas vitastis,
Levastis
Egentes,
Quos pressura maerentes

Contristavit.
Ubi mos proelii poposcerat,
Fortes exstitistis,
Caesar vos milites accierat,
Statim paruistis,

Vicistis
Malignum,

Mortis poena quem dignum
Cito stravit.

2. Iter fidelibus trivistis,
Quo caelum petistis,
Tempsistis
Obscaena
Carnis, Dei amoena

Iam cernitis.
Mortem [diram] praeelegistis
Ferre, quam in istis,
Deistis
Parere,
Caeli regnum hinc vere

Percepitis.
In coetu gregis iucundissimi
Palma coronati,
Assueri, regis praestantissimi,
Dextrae sociati,
Nobis deputati
Probati
Tutores
Contra canis timores

Tricipitis.

3. Vestris nos precibus iuvate,
Veniam rogate
Patratae
Donari
Pravitati, mundari

A vitiis.
Fac nos artissimae salutis
Vivere statutis
Acutis,
Decerni
Ne contingant Averni

Suppliciis.
Regibus caeli praeclarissimis
Nos fac copulari,
Gregibus cum praefulgidissimis
Semper recreari,
Deum contemplari,
Levari
Atque frui mansuris

Deliciis.