275. De s. Lupo Trecensi.

la. Festa dies oritur,

Lupus praesul moritur
Vivens in supernis.

1 b. Eia, digne colitur.
Cuius vita comitur
Laudibus aeternis.

2 a. Cuius ortus ex Francorum
Civitatis Tullanorum
Processit progenie.

2 b. Scholis datur peritorum,
Ubi capit flores morum
Rhetorum manerie.

3 a. His perfusus copulatur
Iure plebis et hortatur
Nobili coniugio.

3 b. Septem annis, ut testatur
Eius vita, coronatur
Castitatis gaudio.

4 a. A coniuge virginali
Fugam petit et aequali
Stare secum proposito;

4 b. A conductu coniugali
Cedit nec non naturali
Renuntians dominio.

5 a. Ab abbate Honorato,
Viro sancto et probato,
Divinis imbuitur.

5 b. Quidquid habet in parato,

Dat egenis et privato

Humilis induitur.

6 a. Trecassina plebs exorat

Iesum Christum et implorat
Lupum [sibi] praesulari.

6 b. Lupus virgo negat, plorat,
Tale onus nam ignorat,
Demum sinit superari.

7 a. Cum Germano, fide sano,
Sensu vero, iure plano,
Exstirpavit haeresim ;

7 b. Britannorum oceano
Falso, diro ac profano
Depulit hypocrisim

8a. Aegros sanat, caecos curat,
Claudos planat et securat
Obsessos daemonibus.

8 b. Reos placat, iram fugat,
Scelus lavat et permutat
Mutos in sermonibus.

9 a. Huius prece te poscamus,
Deus pie, ut tergamus
Vitae nostrae scoriam,

9 b. Fide firma ut agamus
Tuum velle et pergamus
In aeterna gloria.