276. De sanctis Maccabaeis.

1 a. Festa dies et votiva,
Qua refulget rediviva
Mors Maccabaeorum,

1 b. Recensetur, ut condigne
Celebretur ob insigne
Meritum eorum.

2 a. Hi felices sunt in donis,
Sublimati iam coronis
Honoris et gloriae;

2 b. Dum pro lege se dederunt,
Gloriose meruerunt
Titulos victoriae.

3 a. Contemnentes minas regis,

Facientes iussa legis,

Carnibus suillis

3 b. Vesci nolunt, malunt pati
Dira quaeque, decalvati
Cum cute capillis.

4 a. In tormentis gaudent iusti
Caesi flagris et adusti
Frixura sartaginis.

4 b. Sic deformes et despecti
Iam conformes sunt effecti
Caelestis imaginis.

5 a. Etsi carne circumcisi,
Sed in carne non confisi,
Spiritu Iudaei,

5 b. Per velamen superiectum
Intenderunt in aspectum
Legis faciei.

6 a. Cuius vultus claritatem
Idem rerum veritatem
Iudaea caecutiens

6 b. Necdum videt, sed irridet,
Necdum credit, sed recedit
Synagoga mutiens.

7 a. Hi sunt fratres et germani,
Quos beata non inani
Genetrix praesagio

7 b. Caelo misit septem natos,
Septiformis confirmatos
Spiritus suffragio.

8 a. Quibus morte consummatis,
Ne superstes ipsa natis
Deesset in gloria,

8 b. Pati gaudet et salutis
Forma nobis et virtutis
Aeterna memoria.

9 a. Nobis ergo, Iesu bone,
Quos exercet in agone
Iugis colluctatio,

9 b. Horum pia prece praesta,
Ne vel caro vel infesta
Noceat tentatio.

10 a. Auge fidem, spem conforta,

Caritate nos supporta

Deditos peccatis,

10 b. Ut, dum hic exspoliamur,
Revestiri mereamur
Stola claritatis.