Sermo II .

Dominica tertia post Pentecosten. Sermo fratri) Bonaventurae in Conventu Pisano.

Humiliamini sub potenti manu Dei, ut vos exaltet in tempore visitationis, primae Petri quinto .

Insinuantur in verbis istis duo motiva ad humilitatem, quorum primum est sub ratione cogentis, scilicet divinae potestatis praesidentia, quae nobis videtur metuenda: secundum, sub ratione allicientis, scilicet nostrae sublimationis excellentia, quae nobis declaratur appetenda. Vel ita: primo Apostolus Petras suggerit humilitatis actum, ibi: Humiliamini: secundo subiungit humilitatis motivum, ibi: sub potenti manu Deis tertio addit humilitatis fructum, ibi: ut vos exaltet etc.

I. Circa primum nota, quod humiliari debemus triformiter, scilicet quantum ad intellectum in aspectu veritatis: primae ad Corinthios tertio : Si quis

videtur inter vos sapiens esse in hoc saeculo, stultus fiat, ut sit sapiens: Proverbiorum undecimo : Ubi est humilitas, ibi et sapientia

Quantum ad affectum in contemptu vanitatis: ad Philippenses secundo: In humilitate superiores sibi invicem arbitrantes, nihil per contentionem neque per inanem gloriam. - Quantum ad effectum in amplexu vilitatis: secundi Regum sexto: Ludam et vilior fiam plus quam factus sum, et ero humilis in oculis meis.

II. Circa secundum nota, quod movent nos ad humilitatem: supernae Maiestatis fastigium, quod est summe venerandum ; Ecclesiastici tertio : Magna potentia Dei solius, et ab humilibus honoratur. - Nostras vilitatis opprobrium, quod est summe erubescendum: Michaeae sexto: Humiliatio tua in medio tui.

Extremae severitatis iudicium, quod est summe pertimescendum: Ecclesiastici septimo: Memento irae, quoniam non tardabit: humilia valde spiritum tuum, quoniam vindicta carnis impii, ignis et vermis.

III. Circa tertium nota, quod humilitatis fructus est: placare Deum offensum sive iratum per impetrationem indulgentiae ; Psalmus : Cor contritum et humiliatum, Deus, non despicies.

Devincere hostem elatum per triumphationem victoriae ; Psalmus : In humilitate nostra memor fuit nostri et redemit nos ab inimicis nostris.

Elevare hominem deiectum per exaltationem gloriae ; Lucae decimo octavo: Qui se humiliat exaltabitur.