279. De sancta Magdalena.

1 a. Spei vena, melle plena,
Collaudetur, Magdalena,
Cordis, oris iubilo,

1 b. Per quam reis innotescit
Vitae via, ac patescit
Lapsis reparatio.

2 a. Forma patens paenitendi
Et exemplar resurgendi
Datur ista miseris,

2 b. Quae commissa pie flevit
Et per fletum abolevit
Cuncti noxam criminis.

3 a. Corde fervens, spe devota
Christum lavit, a quo lota
Veniam promeruit ;

3 b. Multum amans plus amari
Et a cunctis emundari
Vitiis obtinuit.

4 a. Pie flevit cum hac flente,
Fratre suo resurgente,
Christus, mundi gaudium,

4b. Prima vidit, quem quaesivit
Et quem corde concupivit,
Resurgentem Dominum.

5 a. Felix ergo nos, Maria,
Servos iuva prece pia
Apud regem gloriae,

5 b. Ut in regno claritatis

Nos coniungat cum beatis
Dator indulgentiae.