280. In festo s. Marci Evangelistae.

1 a. Chorum hodie sanctorum
Scandit Marcus angelorum
Adepturus praemia,

1b. Quae mercatus est cruore
Solo Christi pro amore
Tractus ad supplicia.

2 a. Hic est ille par leoni,

Quem Iohannes stantem throni
Vidit in circuitu;

2 b. Huius typum et figuram
Vates novit adfuturam
Absorptus in spiritu.

3 a. Mundi rugit per desertum
Christum prodens in apertum
Gentium agminibus ;

3 b. Verba dura miscens bonis
Illos poenis, hos coronis
Contraxit fidelibus.

4a. Nec ab re manus Samsonis
Ore tulit mel leonis,
Cuius instar pugionis
Rictus saepe laeserat.

4 b. Sic leonis Christi fortis,
Qui praeest inferni portis,
Post triumphum dirae mortis
Gloriam enumerat.

5 a. Cepha verbum Dei fante
Huius manus scribuntsanctae,
Quae autoritatis tantae
Sunt, ut eodem mandante
Credat iam ecclesia.

5 b. Circa thronum maiestatis
Iam in regno claritatis
Qui laetaris cum beatis,
Solve nexus pravitatis
Impetrata venia.