281. De sancto Margareta.

1 a. Largitori gratiarum,

Per quas vicit tot poenarum
Martyr ista genera,

1 b. Decantando iubilemus,
Omnes ei laudem demus,
In aetate tenera

2 a. Margaretam qui dotavit
Dote tanta et ditavit
Paradisi gaudio.

2 b. Annum agens haec quintenum
Omne mundi sprevit caenum
Caelum sperans praemio.

3 a. Oves pascit dum nutrici,
Fraude captus inimici
Praefectus Olybrius

3 b. Concupivit sponsam Christi,
Quae mox capta corde tristi
Sponsum orat sobrius:

4 a. Miserere, Christi, mei,
Ne pervertant sic me rei
Mundi per astutiam;

4b. Cordis mei margaritam
Serva, Christe, incontritam
Carnis pudicitiam.

5 a. Agnae nomen et fidem
Quaerit et originem
Praefectus Olybrius
Volens illam impius
[Vi] sibi copulari.

5 b. Nomen statim indicat,
Iesum Christum praedicat,
Qui custos est virginum
Et plasmator omnium,
Per hunc orans beari.

6 a. Quo audito excandescens
Praefectus et exardescens
Hanc reclusit carcere.

6 b. Die tandem subsequente,
Dum sprevit cum furiente
Idolatra colere,

7 a. Tollitur in aere,
Corpus eius tenerae
Virgis laceratur.

7 b. Qua credente firmiter
Et orante fortiter
Poena iteratur.

8 a. Hinc carcere clauditur,
Per quam daemon teritur,
Draco laniatur.

8 b. Lux refulget clarior,
In qua virgo purior
A Christo vocatur.

9 a. Post patrata quae secreta
Vanos spernit haec atleta
Prorsus deos colere.

9 b. Ignis fasce laceratam

Tortor membris colligatam
Iubet lymphis mergere.

10 a. Columba de caelo data
Mira luce illustrata
"Veni", clamat "filia";

10 b. Caput sponsae pede tangit,
Ligamen omne defrangit
Credunt quinque milia.

11a. Cervicibus qui truncati
Sunt et caelo coronati
Multis cum sodalibus.

11 b. Salvatoris haec ancilla
Decollanda iam, en, illa
Orat pro supplicibus.

12a. Vox columbae sic auditur:
"Votum tuum exauditur.
Sponsa mea decora."

12 a. Felix, quae sic decollaris,
Illuc, quo nunc coronaris,
Transire nos exora.