285. De sancta Lucia.
Ad Laudes.

1. Voce consona laudantes
Christum regem pariter,

Diem festum celebrantes
Concinamus dulciter,

Expugnavit impugnantes
Quo Lucia fortiter.

2 Ignis virtus superatur
Virginis miraculo,

Utque maga reputatur
Inclamante populo,

Consularis sed placatur,
Dum litatur jugulo.

3. Romam vinctum cujus ante
Oculos Paschasium

Ducunt fama laborante,
Quem reatu noxium

Perimerunt judicante
Senatu per gladium.

4. Gloriosa sed Lucia

Nec percussa moritur,

Donec caro Christi pia
Morienti traditur,

Purpurata sic de via
In regno suscipitur.

5. Opem cujus imploremus
Et alma suffragia,

Nos qui corpus possidemus
Ejus hac in patria,

Ut regnanti conregnemus
Summi regis curia.

6. Gloria cordis et oris
Persolvatur numini,

Gratiarum et honoris,
Patri, verbo, flamini,

Qui coronam huic decoris
Dedit sponsae virgini.