288. De ss. Thyrso, Palmatio et Sociis.

1. O athletae Thebaeorum,
O vos cives Trevirorum,
Corpora quiescunt quorum

In hoc sacrato solo,
Vos saluto, vos collaudo,
Mille miliesque plaudo,
Cor et mentem iam non claudo,
Audite me de polo.

2. Felix, Deus quem vocavit,
Sua fide illustravit
Robur mentis et donavit

Acerbae mortis hora!
Tyrse princeps, decollaris,
Bonifati, sociaris,
Pie Soter, applicans

Constanti sine mora.

3. O Palmati, o Maxenti,
Nullus timor fuit menti,
Firmo corde, non paventi

Datis colla candida.
Alexander, progrederis,
Mitis Leander, sequeris,
Quos non, Iustine, deseris,

Mens cum non sit languida.

4. Ach, Papyri cum Hormisda,
Fortis, Faustus, agonista,
Sancta a palaestra ista

Haud metus te fugavit.
Sacer miles Ioviane,
Tu constantiae quam sanae,
Ducis bonum et suave,

Quod mors te triumphavit.

5. O vos innumerabiles,
Celsi fortesque martyres,
Cunctis digne amabiles,

Saluto hilariter,
Qui spreta mundi gloria
Sprevistis transitoria
Pro sanie et scoria

Ob Christum suaviter.

6. Exprobrati, spoliati,
Trusi, caesi et truncati,
Saevo ense decollati,

Tellus madet cruore;
Urbis sacravit moenia,
Dum sex per miliaria
Mosellae rubent flumina,
Christi fusus amore.

7. Mundo ostro exornati,
Margaritis coronati,
Adamante decussati

In choris angelorum
Exsultantes congaudetis,
Carum Christum iam habetis,
Cuius bona possidetis
Cum milibus sanctorum.

8. Trinitati sociati,
Vera vita iam dotati,
Omni bono et beati,

Nostra sumite vota.
En, cum carne premit mundus,
Hostis quoque furibundus
Bella citat nutabundus,

Heu, vobis non ignota.

9. Pro vestra sed victoria
Triumphi assit gloria,
Ne mala transitoria

Conducant ad infernum,
Sed ovantes contemplemur
Deum verum et laetemur,
Vestrae sorti gratulemur

Ultra et in aeternum.