285. De sancta Martha.

1 a. Iucundentur

Plebs devota,

Collaudetur

Mente tota

Vocis Martha sonitu;

1b. Augmentetur

Laus, semota

Noxa detur,

Sit mens lota

Christi freta monitu.

2 a. Cum opima

Non in vanum

Stravit ima,

Misit manum

Mulier ad fortia.

2 b. Orta luxit

Stirpe clara,

Vitam duxit

Sanctam cara

Haec inter consortia.

3 a. Busto Lazarum germanum

Iam foetentem Christus sanum

Huius prece tribuit,

3 b. Ut placeret salvatori,

Mansionem creatori

Omnium exhibuit.

4 a Sponte

Monte

Haec septenis

Annis,

Pannis,

Poenis plenis,

Manserat suaviter:

4 b. Dire,

Mire

Hanc nodosa

Cinxit,

Strinxit

Sic pilosa

Equi zona graviter.

5 a. Erant illi

Affodilli

Ac boletus

Cibus laetus,

Herbae, fructus glandium,

5 b. Nam in vita

Perstans ita,

Dum se nescit,

Quod senescit,

Degustare prandium.

6 a. Uinxit signo crucis magnum

Haee draconem velut agnum,

Domitum compescuit.

6 b. Struens claustrum in honore

Christi matris cum decore

Fratribus disposuit.

7 a. Sic curavit

Et salvavit

Haec, quaesivit,

Quam amisit

Turmam Christus gentium.

7 b. Invitavit

Atque pavit

Haec egentes

Indigentes

Dans salutem mentium.

8 a. Adulescens dum veniret,

Hanc docentem ut audiret,

Rhodano succubuit;

8 b. Fit tumultus, nondum vivum

Mersum dedit redivivum

Sancta, dum procubuit.

9 a. Ergo tandem hanc adivit

Christus, sanctam accessivit

Ad caeli palatium.

9 b. Cernit ibi Dei natum,

Cui angeli paratum

Laudis dant solacium.

10 a. Iesu bone, nobis dona,

Qui sanctorum es corona

Sempiternam gloriam;

10 b. Tu nos ab hac cladis valle

Duc ad vitam recto calle

Marthae per memoriam.