280. (6.) De Beata Maria Virgine.

1 a. Stella maris, stilla mellis,
Sed plus radiosa stellis,
Plus stillis dulciflua,

1 b. Mella procul dans et late
Terras omnes bonitate
Serenat perpetua.

2 a. Foedus pacis mundo datur,
Almo flore ligustratur
Aaron arens virgula.

2 b. Christus ob mortale genus
Fit mortalis, fit egenus,
Fit locus ad iacula.

3 a. Mala nostra ferens ita,
Ne mors vivat, obit vita,
Res prima fit ultima.

3 b. Fiunt arte Dei quadam
Mater virgo, Deus Adam,
Nomina synonyma.

4 a. Nos consolans ea sola
Felix scala, bonis schola,
Cedrum fecit hysopum,

4 b. Est qua puer nobis natus,
Per quem iacet hostis stratus
Et afflictor inopum.

5 a. Vincit pugil ille gentis
Et ereptae de tormentis
Requiescunt palpebrae.

5 b. Felix captivorum status,
Hostis vero trucidatus
Tenet antrum funebre,

6 a. Virgo, candor honestatis,
Virgo, mater pietatis,
Virgo, potens domina,

6 b. Quia sola potes dare

Plus, quamcaelum, terra, mare,
Fer nostra precamina.

7a. Christus, vita redemptorum,
Pestes sedet vitiorum,
Monstra premet scelerum

7 b. Per te, mater speciosa,
Per te, grata Deo rosa,
Per te, flos mulierum.