289. De sancto Mathia.

1. Ave, Mathia, caeli gemma,
in lucem gentium cunctarum
divinitus data.

2 a. Euge, Dei serve,
qui docuisti

veritatis lumen, Christum,
solem iustitiae,
indutum carne,
qui fecit orbem.

2 b. Apostole Christi,
Mathia, sorte
praeelectus, locum Iudae
sortitus intrasti;
agnosce omnes
te diligentes.

3 a. Te plenum fide,

Bethlehem de tribu Iuda
Datum, gaudent habere
consortem in caelis
patres et prophetae,

3 b. Te lignum vitae,

ferens fructus duodecim,
ad medelam gentium
lege doctissimum
legit Emanuel.

4 a. Tu agnum regem,
terrae dominatorem,
de sinu patris venisse
potenter

ad montem filiae Sion
affirmasti,

4 b. Tuque furentem
Leviathan et eius
membra, Iudaeos impios,
Ananum

pontificem, voce clara
confudisti.

5 a. Hinc assessor iusti
iudicis duodecim
iudicaturus
tribus Israel,
quem praedicasti
propitiationis
agnum, regnantem
caelo aeternaliter,
propitiari nobis
precamur misericorditer.

5 b. Hinc manna pluit
Israelitis caelo,
licet ingratis
rebellantibus,
verum Messiam
mystice praefigurans,
quem natum, passum,
mortuum et sepultum
resurrexisse, caelos
ascendisse vere monstrasti.

6 a. Fac Cbristum dulcem,
quem dilexisti,
gregem nos pusillum
degustare
cum sincera fide,
motusque constringi
noxios lacrimis,
Iesum roseum
in cruce speculari.

6 b. Fac igni sancto
patrisque verbo,
quod ardens ut flamma
tu portasti

martyr Christi factus
lapidesque testes
securi caesus
Romano more
caste nos propinquare.

7 a. Audi nos,
nam te filius
Dei libens honorat.

7 b. Salva nos,

Iesu, pro quibus
sanctus Mathias te orat.

8 a. Da laudem, urbs Treberica,
gaude, felix Germania,
de tanto patrono,

8 b. Quem Helena de Iudaea
cum clavis atque tunica
Christi misit dono.

9. Christianismi fidem,
Christe, tibi fac placere
beatoque fine
ex huius incolatu saeculi,
auctor, ad te transire.