Sermo III .

Item, sermo fratris Bonaventurae in domo Fratrum Turonis.

Accipiens Jesus septem panes, gratias agens, fregit et dabat discipulis suis, ut apponerent, et apposuerunt turbae. Et habebant pisciculos paucos, et ipsos benedixit et iussit apponi, Marci octavo .

Septem hi panes morales sunt, quos quidem Christus fregit suo exemplo prius et postea documento, et tradidit doctoribus seu praedicatoribus

Evangelii, ut mundo apponerent ad salutem et eorum pascerent omnem animam.

Primus panis est intentio caelica; Ecclesiastae nono : Vade et comede in laetitia panem tuum etc. - Secundus est conscientia munda: primi Regum vigesimo primo: Non habeo laicos panes ad manum, sed tantum panem sanctum etc. - Tertius est in-telligenlia sapida: Deuteronomii octavo: Non in solo pane vivit homo, sed in omni verbo, quod egreditur de ore Dei. - Quartus est vita bona: Psalmus : Panis, id est vita sancta, cor hominis confirmat et fecit securum. - Quintus est fama odorifera: Isaiae quinquagesimo octavo: Frange esurienti panem tuum. - Sextus est lingua evangelica: Isaiae trigesimo tertio: Panis ei dalus est, aquae eius fideles sunt.

Septimus est vitae aeternae memoria frequentata: Sapientiae decimo sexto : Paratum panem de caelo praestitisti eis sine labore.

Pauci autem pisciculi, condientes et saporantes hos praemissos evangelicos panes, sunt: continuus oculus ad exempla Verbi incarnati, ardens desiderium paradisi, gemens suspirium circa crucem Christi, firmum propositum in gratia perseverandi.