QUAESTIO UNICA. Utrum potentia peccandi sit a Deo ?

D. Thomas. I. hic quaest, I. art. I D. Bonavent. art. I. quaest. Richardus art. I. quaest. 2. Durandi. quaest. I. Gabr. q. I.

Circa distinctionem quadragesimam quartam et ultimam quaeritur: Utrum potentia peccandi sit a Deo ? Videtur quod non, quia non est aliqua potentia, quae non est a Deo; sed potentia peccandi non est aliqua potentia. Probatio, quia si esset aliqua potentia, esset potentia libera ; sed secundum Anselmum de liber arbitr.potestas peccandi non est libertas, nec pars libertatis: igitur, etc.

Item, si potentia peccandi esset a Deo, ergo potentia peccandi est in Deo. Probatio consequentiae : Deus est causa aequivoca respectu omnium, quae causantur ab eo ; sed effectus eminentius continetur in causa aequivoca, et praecipue in causa prima, quam in seipsa ; ergo si Deus est causa potentiae peccandi, ista potentia esset magis in Deo, quod est inconveniens.

Item, omnis potentia, quae est a Deo, habet in universo aliquem ordinem ad alias potentias, quia quae a Deo sunt, ordinata sunt ; sed potentia peccandi non potest habere aliquem ordinem ad alias potentias,

quia quaero an sit superior potentia, an media, an infima. Superior potentia inter potentias non potest esse, quia non convenit Deo, cui suprema potentia convenit. Similiter cum sit potentia ad deficiendum, sive potentia defectiva, non esset potentia suprema. Nec potest esse media potentia, nec infima, quia tunc posset habere potentiam superiorem imperantem, et tunc non esset libera. Ad oppositum in littera cap. 2. et allegat Apostolum ad Roman. cap. 13. ubi vult quod non est potestas, nisi a Deo.