QUAESTIO CLXXXVI.

Qualiter comprehendat In se benedictionem Levi?

Sequitur, Deuteron. xxxiii, 8 et seq. : Levi quoque ait : Perfectio tua, et doctrina tua viro sancto tuo, quem probasti in tentatione, et judicasti ad Aquas contradictionis. Qui dixit patri suo et matri suae : Nescio vos : et fratribus suis : Ignoro vos : ei nescierunt filios suos. Hi custodierunt eloquium tuum, et pactum tuum servaverunt, judicia tua, o Jacob, et legem tuam, o Israel: ponent thymiama in furore tuo, et holocaustum super altare tuum. Benedic, Domine, fortitudini ejus, et opera manuum illius suscipe. Percute dorsa inimicorum ejus : et qui oderunt eum, non consurgant.

in benedictione ista novem ponuntur. Primum est perfectio vitae, ibi, Perfectio tua. Secundum est altitudo doctrinae, ibi, Et doctrina tua. Tertium est Christi eductio, et hoc est : Viro sancto tuo. Quartum est omnium abnegatio, et hoc est: Qui dixerit patri suo, etc. Quintum, Praeceptorum et consiliorum impletio, et hoc est: Hi custodierunt eloquia tua, etc. Sextum est pro aliis intercessio, et hoc est : Ponent thymiama, etc. Septimum est de passione glorificatio, et hoc est: Benedic, Domine, fortitudini ejus. Octavum est de operibus remuneratio, et hoc est : Opera manuum illius suscipe. Nonum est hostium destructio, et hoc est : Percute dorsum inimicorum ejus.

Hujusmodi sufficientia sumitur sic : Benedictio vel est pertinens ad meritum, vel ad praemium. Si ad meritum, vel est in essendo, vel in operatione. Si in es- sendo, vel est in substantia, vel in efficientia. Si in substantia, vel est in se, et sic est vitae perfectio : vel respectu aliorum, et sic est altitudo doctrinae. Si in efficientia, sic est Christi eductio. Si autem est meritum in operando, vel est in se, vel in aliis. Si in se, vel est a malo, et sic est omnium abnegatio : vel est bonum, et sic est consiliorum et praeceptorum impletio quae sunt in utroque Testamento. Si autem est in operando in aliis, sic est pro aliis intercessio. Si autem pertinet ad praemium, vel est absolute, vel respective. Si absolute, sic est de passione glorificatio et de actione remuneratio. Si respective, sic est hostium, destructio.

Qualiter autem haec omnia fuerunt in beatissima Vimine, facile est videre : ipsa enim fuit perfectissima in vita, altissima in doctrina, qua totam legem scivit,

Christum quoque de suo utero eduxit, qui ibi quadraginta septimanis sex diebus minus quievit. Item, omnia abnegavit et perfectissimam paupertatem in summo habuit, ut supra patuit. Item, praecepta et consilia in summo et ex charitate in summo implevit. Item, pro aliis intercessio in ipsa in summo fuit, quae pro omnibus Dominum placavit, et adhuc pro nobis ipsi pectus offert et ubera ostendit. Item, quia post Filium summam passionem habuit, et summani de passione habuit glorificationem. Item, quia summas et nobilissimas actiones habuit, et summam habuit remunerationem. Item, quia sibi et omnibus nobis hostem vicit a quo numquam victa fuit, supremum de hoste triumphum reportavit.

Et sic patet qualiter beatissima Virgo habuit benedictionem Levi.