292. De s. Mauritio et Sociis.

1. Gratuletur totus mundus
In hoc festo Iactabundus,
Caelum, terra, maria.

2 a. Iucundentur Agaunenses,
Laudes laeti persolventes
Martyrum praesentia,

2 b. Qui pro Christo sunt necati,
Sexaginta sex armati
Sexcenti sex milia.

3 a. Hanc stragem Maximianus
Fecit, mente vir profanus,
Repletus insania.

3 b. Qui bis eos decimavit
Nec hos tamen superavit
Fortes Dei gratia.

4 a. Ergo, sacra legio,
Tuo nos auxilio
Christo reconcilia,

4 b. Qui baptismi flumine,
Suo fuso sanguine,
Nostra lavit vitia;

5 a. Tandem per martyrium
Et mortis supplicium
Nos ditavit gloria.

5 b. Unde nos suppliciter
Omnes unanimiter
Vestra patrocinia

6. Poscimus hilariter,
Ut vivamus iugiter
In caelesti patria.