285. (11.) De s. Maria Magdalena.

1 a. Magdalenes inclita
Gesta, mores, merita
Exaltemus,
Exsultemus

Vultu, voce, mente.

1 b. Florentem amygdalum
Nobile dat Magdalum
Amygdalo
A Magdalo

Nomen sortiente.

2 a. Haec spretis deliciis
Mundi, carnis vitiis
Se fugit et saeculum,

2 b. Theoriae filiis,
Paradisi liliis

Exemplar et speculum.

3 a. Proficit in melius

Mores iam correcta,
Se custodit artius

Solito cor, recta
Via vitae rectius
Tendit in directa,
Legis vitat invia.

3 b. Diligit, quem eligit,
Sed prius electa,
Dum dilectum diligit

Deligens dilecta,
Mundi pompas abigit
Spe sursum erecta,
Leni telo saucia.

4 a. Regit amor, dirigit

Fides, quam spes erigit,
Provida se porrigit
In anteriora.

4 b. Fervet, amat, uritur,
Igne cor accenditur,
Instituta sequitur
Melle dulciora.

5 a. Nunc laetas maestitias
Fovet, nunc delicias,
Vix capit divitias ;
Has dat amor rectus.

5 b. Regnantem in pectore
Cernere summopere
Quaerit, agit propere,
Quod iubet affectus.

6 a. Fontem vitae lacrimis
Dum rigat uberrimis,
De petra mel sugens
Dolens, gaudens, lugens,
Dulci condit oscula
Imbre lacrimarum.

6 b. Felici devotio

Gaudet in obsequio,
Dum fervor dulcescit,
Fruens dulcor crescit ;
Quidquid agit sedula,
Censet amor parum.

7 a. Fluit a dulcedine

dulcor in cor laetum,
Praesens est tranquillitas

reddens cor quietum,
Invitat ad gaudia

spes virtutum coetum ;
Supra se mens tollitur.

7 b. Ut fluant aromata,
paradisum mentis
Auster perflat, spiritum

vini ignientis
Sentit, sed vix sustinet
aestus vehementis

Fervorem, quo rapitur.

8 a. Resurgente Domino
mundus resurrexit;
A torpore languido

iacentem erexit
Magdalenae, nuntians,

quod dies illuxit
De sepulcro Domini,
dies, quem adduxit
Ortus sol iustitiae.

8 b. Quam felices habuit
successus ad vota,
Dum agnovit Dominum

voce verbi notal
Novus sol laetitiae
refulsit in mente
Vero iam exterius
sole refulgente,

Sole quidem gloriae.

9 a. O beata nuntia

Communis laetitiae,

Tuis sis propitia ;
Iesum, venam veniae,
Collatorem gratiae

Nobis reconcilia.

9 b. Tot insurgunt proelia,
Tot latent insidiae,

Tot infestant vitia,
Seducunt blanditiae;
Hac valle miseriae,

Tuis fer solacia.