294. De sancto Nicolao.

1 a. Caeli principi dulcibus

canticorum melodiis

debita sibi vota

cunctorum

ferantur voce consona.

1 b. Qui braviis

talentorum felicibus

famulos duplicata

portantes

remunerat commercia.

2 a. Summa sapientia,

cui famulantur omnia,

caelos; terras, maria

divina

formasti praescientia;

2 b. Nicolaum splendida

magnificasti gloria,

cuius laus eximia

per orbem

nitescit famosissima.

3 a. Hic ab matris uberibus

pastus a lacte

pressit tenera

providus labia

bis hebdomada.

3 b. Post orbatus parentibus

tres lupanaris

ab infamia

virgines liberat

cum pecunia.

4 a. Lapsa vox astris

episcopalis

regere quem sacra

dignitatis

praecepit officia.

4 b. Maris procellas

sedavit altas

ipsius gratia,

nautae necis

evadunt pericula.

5 a. Triticea germina

precibus illius

populis

sunt aucta.

5 b. Tres ex consulis, binos

a Caesaris homines

eripit morte

cruenta.

6 a. Talis adornat polos

anima ;

sudor manans eius ex tumba

aegra sanat corpora.

6 b. Nicolae, pietas

maxima

regnat in quo cum clementia,

nostra suscipe vota;

7. Prece cum sedula

nos Deo nostro commenda.