297. De sancto Nicolao.

1 a. Recordare, grex fidelis,

Nicolai, quem in caelis

Clarum dedit gratia.

1 b. Hic ab annis iuvenibus

Abstinens ab uberibus

Quarta, sexta feria.

2 a. Lactans coepit ieiunare,

Lasciviam refraenare

Amando ieiunia.

2 b. Post libuit addiscere,

Menti artius condere

Literarum studia.

3 a. Dulci gustu capiebat,

Quae auditu hauriebat,

Divina eloquia.

3 a. Tres virgines redimere

Curavit auri pondere

Turpi ab infamia.

4 a. Earum patri consulit

Auri pondo, quod contulit,

Levat ab inopia.

4b. Electus in pontificem

Praesulis scandit apicem,

Prima tenens studia.

5 a. Promotus est divinitus

Elapsa voce coelitus

A Dei clementia.

5 b. Nicolaus mitis, blandus,

Praesul digne memorandus,

Agit mirabilia.

6 a. Nicolaus, felix heros,

Liberavit tres pueros

Fraude captos impia.

6 b. Nicolaus, Deo notus,

Ut fidelis et devotus

Pollet in ecclesia.

7 a. Praesulis fama celebris

Obscuris latet latebris

Per cuncta confinia.

7 b. A cunctis fere gentibus

Linguis vocatur omnibus,

Ut ferat auxilia.

8 a. Residentem super thronum

Clerus, vulgus hunc patro-

num

Quaerunt cum fiducia.

8 b. Vivus fulsit miraculis

Defunctus confert singulis

Multa patrocinia.

9 a. Qui se marinis fluctibus

Dant, piis clamant vocibus

Ipsius praesidia.

9 b. Qui carbasa credunt ventis,

Horis cunctis et momentis

Praesulis auxilia

10 a. Non omittunt requirere

Nec frustrantur a munere;

Praestat beneficia.

10 b. Super terram et in mare

Paratus est adiuvare

Meritorum gratia.

11a. Longe, late declaratur,

Plebs in dies renovatur,

Gaudet mundi patria.

11b. Sidus caelestis curiae,

Aeterna fruens requie,

Oppressis mireria,

12 a. Tui praeclari nominis,

Quod habes dono numinis,

Impende remedia ;

12 b. His, qui tuam memoriam

Colunt, petunt clementiam,

Ne sequantur devia.

13 a. Nicolae, qui in caelis

Gloriaris cum angelis,

Olei laetitia

13 b. Nos perfundas et largire

Ut possimus introire

Caelorum palatia.