Laus et Speculum Reginae Caelorum.

Incipit prologus in laudem et speculum reginae caelorum.

Reginae cunctorum et dominae caeli et terrae, beatae et gloriosae
semper virginis et Dei genetricis Mariae gratia et pietate fidentibus,
gloria et honore gaudentibus, eiusdem minimus sua Deique gratia
servulus praesentem et aeternam salutem Dei genetricis et virginis.

Aegrotanti mihi tempore sacro quadragesimae et lectulo decum-
benti piae voluntatis et meditationis id incidit, immo desuper, sicut
sensi, radius mihi caelestis inspirationis illuxit, ut de tanta tamque .
magnifica virgine gloriosa pium aliquid per Dei gratiam excogitare
temptarem , memoriae litterarum, sicut dignum et fructuosum, sicut
honestum et utile, coeptum commendans opusculum. Quod leni
consonantia resonans et dulci currens eloquio mentes legentium,
animos audientium dulcedine sua demulceat, demulcens alliciat,
alliciendo foveat, fovendo provehat et accendat ad amandam et
venerandam venerabilem et gloriosam semper virginem et Dei gene-
tricem Mariam.

Quod ita concipiens corde et animo, ad virginem inde recurrens,
regnantem in ea sicut in proprio throni sacrario spiritum sanctum
per eandem mente deposco, quatenus mihi de sacra virgine gloriosa
sua benignitate et gratia piissimus inspirare dignetur, quod sibi
gratum, virgini non incongruum, amantibus eam propitabile, salutiferum
et utile fiat. Non amantibus enim videtur amarum, quod dulce est.
Sed vae, qui dicunt malum bonum et bonum malum, ponentes tenebras
lucem et, quod dulce est, in amarum et e converso!

Piam etiam piissimae virginis clementiam, fiduciam habens in
ea, supplex fidenter exposco, quatenus mihi fluminis impetus laetificans
civitatem Dei de fonte virginis gratiae septiformis inundet, eadem
desuper infundente, qua semper tota redundat Maria gratia plena,
ad laudem virginis et gloriam filii sui Iesu Christi, Domini nostri.

Hoc autem opus non ex industria neque fato neque fortuna,
sed sicut Dominus dedit et sicut per dies unum post aliud capitulum
singillatim scriptum est, in quinque partes distinxi. Non enim omnia
simul morbo detentus explevi. Quod si robustior essem, eodem,
capitula quo digesta sunt ordine, singula distinguere maluissem, ut
qui forte morbo vel occupatione, taedio vel oblivione totum offerre
non poterit, quantum ei spiritus sanctus inspiraverit, Deo praesentet
et virgini et iugi voto decantet ad honorem et gloriam Dei et laudem
genetricis eiusdem, gloriosae virginis Mariae, reginae caeli et terrae.

Praesentem vero libellum, quantum ad actorem, ''opusculum,
quantum ad virginem , laudem et speculum et opus caeleste ''vocamus
et librum virginis almae per partes quinque divisum. Sed quinis
partibus illis, si praesens prologus, initia titulorum et finis subiecto-
rum addantur, non solum septem instar gratiae septiformis. sed
partes octo refulgent instar aeternae beatitudinis. Unde scriptum
est: Da partes septem necnon et octo: Septem in promerendo, octo
quidem in possidendo; septem in exsilio, octo quidem in patriae
gaudio ; septem in gratia septiformi, octo quidem in gloria multiformi.
Vel septem et octo in utraque vita, in utraque stola, in utraque
ecclesia, in utraque vitae corona: in corona praesentis victoriae, in
corona perpetuae gloriae. Septem partes dat ecclesiae vel sibi et
animae suae, qui numero vitae septenario in activa vita gratia septi-
formi refulget, octo partes novit dare, qui per septemplicem volat
gratiam ad supcrnae visionis octonarium et aeternae beatitudinis gloriam.

Explicit prologus. Incipit titulus in introitum libri huius.

Ecce, patens aditus praesentis porta libelli,
Porta patens penitus patientibus atque rebelli !
Hic etenim pravis mentisque quibusque suavis
Emicat orandi modus, hostia sacrificandi,
Sicque Deo digne varii spiraminis igne
Hostia praeclara cordis mactatur in ara,
Plusque Deo cara, dum plus toleratur amara.
Agna, columba, capra, triplex haec hostia sacra,
Alba, rubens, taetra caelesti spirat in aethra,
Contemplativi, certantis et inchoativi
Gratia, martyrium, contritio, tus quoque dium,
At super, intro, foris redolent incensa doloris.

Explicit titulus.