Sermo III .

Item, sermo fratris Bonaventurae Fratribus Parisius in Capitulo, Dominica octava post Pentecosten.

Ipse enim Spiritus testimonium reddit spiritui nostro, quod sumus filii Dei, ad Romanos octavo .

Notandum, quod comprobantur legitimi filii illi qui sunt honesti per sanctimoniae puritatem: ad Ephesios quinto : Estote ergo imitatores Dei sicut filii carissimi. Fornicatio autem et omnis immunditia, aut avaritia nec nominetur in vobis, sicut decet sanctos.

Devoti per Ecclesiae sedulitatem: ad Galatas quarto: Quoniam estis filii, misit Deus Spiritum Filii sui in corda vestra clamantem: Abba, Pater.

Pacifici per familiae unitatem: Matthaei quinto: Beati pacifici, quoniam filii Dei vocabuntur.

Studiosi per diligentiae probitatem; Ecclesiastici tertio : Filii sapientiae, ecclesia iustorum, et natio illorum, obedientia et dilectio.