288. (1.) Incipit Introitus.

1. Ave, Maria,

Gratia plena,

Dominus tecum!

Felix et pia,

Virgo serena,

Quidquid est aequum,

2. Quidquid est tutum,

Quidquid virtutum

Et honestatis,

Quidquid est floridum,

Nobile, lucidum

Amoenitatis,

3. Per tuum Ave,

Mundo suave,

Nobis illuxit,

Omne molestum

Vel inhonestum

Procul excussit.

4. Benedicta tu,

Deum adfatu

Quae Gabrielis

Et genuisti

Et aluisti,

Virgo fidelis,

5. In generali

Sexu mortali

Veteris Evae

Quae depulisti

Et diluisti

Geminum Vae Vae.

6. Virgo sacrata,

Partu beata

Virginitatis,

Mater intacta

Filium nacta

Divinitatis.

7. Et benedictus,

Nobis astrictus

Humanitate,

Uteri tui

Fructus, quo frui

Cum ubertate

8. Sancti laetantur

Et gloriantur

Ordines poli,

Unde fovetur,

Quidquid tenetur

Ambitu soli.

9. Spiritus sanctus,

Talis et tantus,

In te descendit

Teque benigne

Suo sic igne

Totam accendit,

10. Ut velut ignis

Rebus et signis

Lucida fias,

Tua resplendens

Mentes succendens

Gratia pias.

11. Virtus et patris

Gaudia matris

Tibi donavit,

In te resedit,

Tibi se dedit

Et obumbravit.

12. Unde, quod natum

Ex te beatum,

Est causa rei,

Iure vocatur

Et adoratur

Filius Dei.

13. Dumque favisti,

Dum paruisti

Regi superno,

Sic genuisti,

Sic meruisti

Lumine terno,

14. Lumine veri

Regis impleri

Gratia Dei

Voce sub illa:

Ecce, ancilla

Domini mei.

15. Sic inspirata,

Sic vulnerata

Cuspide zeli,

Dulcis amoris

Intus et foris

Numine caeli

16. Ferves et amas,

Fervens exclamas,

Virgo perita:

In me servata,

Mihi cognata

Caelibe vita

17. Fiat ancillae

Dei tantillae

Mihi secundum

Tuum hoc tale

Verbum vitale,

Sanctum et mundum,

18. Ut salva mei

Filium Dei

Virginitate

Utero feram,

Integra geram

Fecunditate.

19. Mater divina

Sic et regina

Facta credendo,

Dominum caeli

Verbo fideli

Concipiendo,

20. Matris honore

Gaudes cum flore

Virginitatis,

Virgo perfecta

Mater effecta,

Sed deitatis.

21. Aevus ) conclavi,

Munda, suavi

Rex honestatis,

Deus et homo

Tuae in domo

Integritatis

22. Sedit absconsus

Et tamquam sponsus

Inde processit,

Sed hic a mente

Tua clemente

Nunquam recessit,

23. Tua qui porta,

Nunquam distorta

Satanae morbis,

Venit a clausa

Nostri de causa

Conditor orbis,

24. Ut solis radius

Semper innoxius,

Immo sol verus

Intrans et exiens,

Lenis et leniens

Nunquam severus.

25. Ergo, quae solem

Deum in prolem,

Virgo, tulisti,

Sole divino

Magis omnino

Virgo fuisti.

26. Ergo, luciflua

Virgo, dulciflua,

Quae non contemnis

Nos, licet humiles,

Nebulae similes,

Virgo perennis,

27. Quaesumus miseri,

Nebula veteri

Caliginosi,

Quaesumus humiles,

Turbidi, fragiles

Et tenebrosi,

28. Nos pie libera,

Virgo lucifera,

Saeculi salo,

Mundi periculis,

Zabuli spiculis,

Ab omni malo.

29. Ut tibi tantae

Virgini sanctae

Complaceamus,

Ut tui nati

Regna beati

Possideamus,

30. Ut tibi tecum,

Sicut est aequum,

Congratulemur,

Ut sine nebula

Christo per saecula

Congloriemur.

Explicit Introitus.

Incipit commendatio et commendationis oratio.

Incipit e caelis oratio lapsa fidelis,

Cor faciens alacre, laus sacra lausque sacrae,

Laus genetrixque Dei, sacra semper virgo Maria,

Nunc et, virgo, mei dux, precor, esto pia.

Explicit commendationis oratio.

Incipit titulus in primo capitulo.

O regis speculum, decus omne iubarque suave,

Virgo, poli speculum, lucis et orbis, ave.

Gratia glorificans actorem, quid mage conor?

Christum magnificans gloria, laus et honor,

Vita, salus orbis, confectio congrua morbis.

Quantus honos hominum ! virgo parit Dominum.

Te rogo mente pia, mihi virgo medere Maria

Et miserere mei semper amore Dei

Daque, per hoc munus mihi fiat trinus et unus

Et caelum propius ), rex sine fine pius.

O lux, o species, specimen speculi speciale,

Lux, via spesque, dies, stella marina, vale !

Munus, virgo, precum Christo simul offero tecum,

Contiguum laudi tu suscipe, mitis, et audi.

Explicit titulus.