300. De s. Odilia Hohenburgensi.

1 a. Salve, decus virginale,
Templum Dei spiritale,
Beata Odilia;

1b. Ab aeterno praeelecta,
Deo enim es dilecta
Sponsa tu et filia.

2 a. Salve, virgo, caeca nata,
Fonte vitae quae renata
Claro vides lumine:

2 b. Nos peccatis excaecatos,
Virgo felix, fac purgatos
Lacrimarum flumine.

3 a. Portas clausas oculorum
Tibi pandit rex caelorum
Testans mirabilia.

3 b. Cinnamomum spiritus
Tu gustando caelitus
Mundi spernis vilia.

4 a. Salve, stirps Francigena,
Quam verus verbigena
Sponsam sibi elegi;

4 b. Myrtum temperantiae,
Florem coutinentiae
Christus in te diligit.

5 a. Tuque clausis oculis
Patri fis odibilis,
Mori te dictaverat.

5 b. Flos tener iam despiceris,
At mater, qua diligeris,
Abrae te commiserat.

6 a. Tu caelestis infans radians,
Quam nutrix sagax applicans
Uber dextrum sugere.

6 b. Tu, virgo latens inclita,
A convicinis prodita
Palmam missa fugere.

7 a. Tu civitas abscondita,
Lucerna ut recondita,
Proderis divinitus

7 b. Ebur, praesul Noricorum,
Te inquirens hinc decorum
Erhardus admonitus

8 a. Palmam venit Deo duce,
Te invenit caecam luce,
Lavit in baptismate.

8 b. Laus miranda sequitur,
Visus tibi redditur,
Ut liniris chrismate.

9 a. Sol, Christus, iustitiae
Recordatus miserans
Tuae adulescentiae,
Te patri reconcilians.

9 b. Lux immensa claruit,
Ad tuum desiderium
Vox verbi dum aparuit
Consignans oratorium.

10 a. Salve, lampas caritatis,
Ob amorem trinitatis
Trinam plantas tiliam;

10 a. Verbi tamen improlati
Mero vasis expotati
Recreas familiam.

11a. O beata sponsa Christi,
Quanta qualisque fuisti,
Probat mamma, quam suxisti
Corruptelae nescia.

11b. In suprema montis vectum
Bobus plaustrum recollectam
Inde lapsum per directam
Servas per suffragia.

12 a. In procinctu constitutum
Atque poenis involutum
Prece patrem reddis tutum,
Dumque saxum quasi lutum
Flendo stillas concavum.

12 b. Iesu, auctor pietatis,

Morbum aufer caecitatis,
Tam internae claritatis
Quam externae sospitatis
Nobis dona gaudium

13. Ottiliae per meritum
Nunc et in perpetuum.