301. In Translatione s. Odiliae, Sociae s. Ursulae.

1 a. Laudes Deo persolvemus,
Cuius dono nos tenemus
Diem hanc Iaetitiae.

1 b. Ossa sacra veneremur,
Quae translata profitemur
Virginis Odiliae.

2 a. Anglorum cognata regis

Inclita fuit Caesaris

Maromei filia;

2 b. Flagrans Christi caritate
Sprevit, nitens castitate,
Paterna fastigia.

3 a. Dono fulgens speciali
Turmae praeest virginali
Numero sub milleno;

3 b. Ursulae, sanctae virgini,
Datur ista solamini
Comitatu sereno.

4 a. Pro Christo haec cum aliis
Diris necatur gladiis
Sub Hunnorum rabie.

4 b. Regio conditur more,

Sed maximo cum maerore
Civium Coloniae.

5 a. Regna scandit gloriosa,
Gaudet virgo speciosa
Cum sanctis feliciter.

5 b. Clara carne surrectura
Christum Iesum est visura
Cum iustis perenniter.

6 a. Huius Deus sanctitatem
Iuxta suam pietatem
Nostris pandit fratribus.

6 b. Extollit nostrum ordinem
Odiliam per virginem,
Cunctis dignam laudibus.

7 a. Converso viro simplici
Apparet virgo triplici
Praeclara visione,

7 b. Ostensa qui Parisius,
Iohannes dictus, citius
Implevit actione.

8 a. Pergens ergo Coloniam,
Civitatem egregiam,
Summo cum conamine

8 b. Certo prodit indicio
Visa civi primario

Haec, Arnulpho nomine.

9 a. Qui recusat fodi hortum,
Tumulis mirans consortum
Semotam hanc virginem;

9 b. Uxoris flexus prudentis
Prece devotae et mentis
Dei audit hominem.

10 a. Altius hinc fodientes
Reliquias redolentes
Invenere pariter.

10 b. Adest clerus cum populo
Honorem dantes loculo
Virginis hilariter.

11 a. Aegri plures sanabantur,
Grates Deo solvebantur
Plebis cum tripudio.

11b. Hoc thesauro decoraris,
Hoyum, atque defensaris
Huius patrocinio.

12 a. Ave, sancta Odilia,

Pro nobis fer suffragia
Summum ante Dominum,

12 b. Quo mundi post miseriam
Plenam cunctorum veniam
Habeamus criminum,

13 a. Ne nos pro nostro vitio
Orbati Christi pretio
Craciemur graviter,

13 b. Sed tuis sanctis precibus
Adiuncti caeli civibus
Gloriemur iugiter.