305. Planctus Paenitentis.

1. Pange, lyra cordis mei,

carmen lamentabile,

Regum regem rogitando

valde admirabilem,

Ut me liberet a malis,

quibus gravor graviter.

2. Rerum omnium creator,

pater invisibilis,

Fili Dei, cosmi rector,

pulcher, ineffabilis,

Spiritus, qui astas cordi

hominis, almificus,

3. Deus trinus in personis,

unus in substantia,

Qui plasmasti cuncta verbo

orbis unus climata,

Me nunc, deprecor, exaudi

mea tollens crimina.

4. Meque miserum errantem

suscipe, piissime,

Et ad patriam caelestem

facito pertingere,

Quem errantem redemisti

tuum dando sanguinem.

5. Meo sensui infunde

lumen almi spiritus,

Cuius lumine accensus

propriis a nexibus

Merear absolvi cito,

fusis, quaeso, precibus.

6. Meque doce, rex caelestis,

agere quid debeam

Quidve loqui, quid tacere,

facere quid valeam,

Ut ad arva paradisi

te iubente transferar.

7. Fortitudinem da mihi

praebe et prudentiam,

Temperantiam concede

dando et iustitiam,

Mihi dona caritatem

atque pudicitiam.

8. Tolle crimen voluptatis,

tolle et luxuriam,

Pelle crimina nefanda

auferendo noxia,

A me vana cuncta aufer

inserendo optima.

O. Heu, me miserum, quid agam

tabefactus scelere?

Grlisco Christum possidere,

glisco caelum scandere,

Sed non possum oneratus

delictorum onere.

10. Vae, vaemihi, ad quem curram,

qui mecum condoleat?

Me gravantur valde dira

peccatorum onera,

Quibus licet circumsaeptus

iuges fundo lacrimas

11. Rogitando te, salvator,

qui salvasti saeculum,

Mihi quatenus concedas

spiritum paraclitum,

Quo repletus te laudare

queam perspicacius.

12. Spiritales sensus quaero

castumque corpusculum,

Meque vas electionis

facito purissimum,

Quo digneris semper esse

veniens assiduus.

13. Portas poli paradisi

facito me ingredi,

Ubi gaudeam translatus

iugiter cum angelis,

Qui te laudant incessanter

laudibus hymnidicis.

14. Sonant ibi melodiae

laudes ineffabiles,

Quae cantantur a pollenti

Angelorum agmine,

Quome Christus, suum plasma,

faciat pertingere.

15. Qui cum patre regnat semper

et cum sancto spiritu

Venturusque est de caelo

iudicare saeculum,

Ipsi honor et potestas,

decus et imperium.

16. Salva, salva, rex caelestis,

illum virum sedule,

Qui composuit hoc carmen,

carmen amicabile,

Atque sibi dona illud,

quod sonat in carmine.

17. Fiat, fiat, fiat sibi,

sicut carmen postulat,

Atque sibi rex caelorum

tribuat haec omnia,

In superna paradisum

possidere faciat.