306. De sancto Pantaleone.

1 a. In excelsis regum regi,
Per quem constat cuncta regi,
Honor sit et gloria;

1b. Olim digne militantis

Martyris, nunctriumphantis,
Canitur victoria.

2 a. Panthaleon, flos decoris,
Floret proles senatoris,
Civis Nicomediae.

2 b. Medicinam edocetur,
Regi placet et censetur
Aulae consors regiae

3 a. Hermolaus catechizat

Unctum mente, post baptizat
Praeventum miraculo.

3 b. Puer, angue qui ligatur,
Eius prece liberatur
A letali vinculo.

4 a. Christiana obit mater,

Caecus videt, credit pater,
Confringuntur idola;

4 b. Gressu claudi comprobatur
Vera fides, spes frustratur
Sacerdotum frivola.

5 a. Iustum lampas, crux, sartago
Torquent, lapis et vorago
Aequoris, nec vincitur.

5 b. Ater illum carcer angit,
Leo pavens lingua tangit,
Rotae strues frangitur.

6 a. Ensis rigor dum lentescit,
Signum lictor obstupescit,
Vox testatur bravium.

6b. "Portus" , inquit, "naufra-
gantum
Es , susceptor tribulantum,
Miserator omnium".

7 a. Arbor fructu fecundatur,
Sub qua martyr decollatur
Currit lac pro sanguine.

7 b. Corpus albens concrematur,
Caput salvum conservatur
Ignis a voragine.

8 a. Sub altari clam locatur
Cinis sancti, caput datur
Tibi, urbs Byzantium,

8 b. Quod post tua ex ruina
Teutonum urbs Agrippina
Gratum fovet spolium.

9 a. Ut in auro gemma patens,
Sic in auro caput latens
Laudum dat insignia.

9 b. Caeli vernat in roseto,
Mundi fraglat in spineto
Martyr per prodigia.

10 a. Quo patrono
Tuo dono,
Christe, dato
Nobis grato

Fac nos dignos gratia ;

10 b. Ipso duce
Vera luce
Perfundamur
Et fruamur

Dei patris gloria.