255. De sancta Justina.

1. Annalis, ecce, orbita
Nobis reduxit gaudia,
In qua Justinae virginis
Festa clarent et martyris.

2. Quae Christo sponsa dedita
Florebat in ecclesia,
Die noctuque Dominum
Deposcens ad auxilium.

3. Hinc ille serpens lividus,
Mortis veneno perfidus,
Hanc pollicetur tradere
Malefico in scelere.

4. Aggreditur insidiis
Castum cubile virginis,
Quo pelliceret fraudibus,
Quam protegebat Dominus.

5. At virgo fortis brachio
Crucis munita clipeo
Hoste prostrato impio
Lucrato gaudet aemulo.

6. Adseivit sibi socium,

Quem prius sensit aemulum,
Qui juncti simul validi
Praedam tulerunt barathri.

7. Post praesul Christi Domini
Et mater monasterii,
Pari corona incliti
Effulsere martyrii.

8. Regnant in coelis aurei,
Qui hic vicere ferrei,
Agnum sequuntur praevium,
Quem coluere Dominum.

9. Precemur ergo singuli,
Omnes clamemus subditi,
Quo sacrae matris merito .
Christo vivamus Domino.

10, Gloria sit altissimo,
Celso qui sedet solio,
Qui sanctis auget praemia
Optata post victoriam.