312. De ss. Petro et Paulo.

1 a. Iubar mundo geminatur,
Dies festus renovatur,
Caeli luminarium,

1b. Petrus, pastor almi gregis,
Paulus, doctor summae legis,
Transeunt ad bravium.

2 a. Cruce Petrus, Paulus ense
Cursum complent, sic immen-
sae
Culmen sandunt gloriae;

2 b. Laeti petunt caeli caelos,
Caeli, terra promant melos
Laetae modulantiae.

3 a. Hi sunt nubes coruscantes,
Terram cordis irrigantes
Nunc rore, nunc pluvia;

3 b. Hi praecones novae legis
Et doctores novi gregis
Ad Christi praesaepia.

4 a. Signa mira, dogmata,
Virtutum aromata
Profundunt odoris ;

4 b. Reges, vincla, verbera
Famen, sitim, aspera
Vi vincunt amoris.

5 a. Laus communis est amborum,
Cum sint tamen singulorum
Dignitates propriae.

5 b. Petrus praeit principatu,
Paulus pollet magistratu
Totius ecclesiae.

6 a. Petrus, heres verae lucis.
Fert inversus poenam crucis,
Paulus ictum pugionis,
Nec diversae passionis
Sunt diversa praemia.

6 b. Patres summae dignitatis,
Summo regi conregnatis,
Vincla nostrae pravitatis
Vestrae solvat potestatis
Efficax sententia.