313. De Vanitate Mundi.

1. Quid in hac miseria,

Miseri, moramini?
A mundana gloria

Quare delectamini

Vos, qui moriemini
Relinquentes omnia?

Mors, qui parcit [nemini],
Vestra tollet gaudia;

Sic egrediemini.

2. Opum adfluentia

Parum prodest homini ;
Mundi sapientia,

Sicut bene memini,

Iuxta verbum Domini
Quaedam est stultitia.

Illud intuemini,
Relinquentes vitia

Virtutes sequimini.

3. Vae vobis mortalibus,
Qui putatis vivere,

Cum mors sit in foribus,
Quae solet occidere
De cunctorum genere

Filios cum patribus.
Homo, reminiscere,

Cum abundas opibus,
Eas te dimittere.

4. Unum prosit omnibus
Dominum metuere,
Non ipsum timentibus

Verum est acquirere
Deum diligentibus,

Quidquid volunt petere,
Iustis tamen precibus,

Sic debemus credere.

5. Quae te vincit rabies?

Nam tua res agitur,
Dum vicini paries

Proximus comburitur.

Hic vivit, hic moritur;
Die, homo, quid facies?

Quidquid orbe clauditur,
Et genus et species

In momento perditur.