Sermo II .

Dominica duodecima post Pentecosten. Sermo fratris Bonaventurae Parisius, in Capitulo de mane.

Beati oculi, qui vident quae vos videtis, Lucae decimo .

Duo tanguntur, scilicet novae gratiae mira felicitas, ibi: Beati oculi, qui vident: mirae felicitatis expressa dignitas, ibi: quae vos videtis.

I. Dicit ergo: Beati oculi, Apostolorum et iustorum novae gratiae; et beati, inquam., quia: purificati divino spectaculo per pietatem theosebiae ; Psalmus : Oculi mei semper ad Dominum, quoniam ipse evellet de laqueo pedes meos.

Revelati divino radio per humilitatem disciplinae ; Genesis quadragesimo quinto: En, oculi vestri et oculi fratris mei, Beniamin, vident, quod os meum loquatur ad vos.

Recreati divino consortio per ubertatem devotionis internae; Deuteronomii trigesimo tertio: Oculus Iacob in terra frumenti et vini, caelique caligabunt rore. - Honestati divino exemplo per austeritatem poenitentiae; Genesis quadragesimo tertio : Attollens Ioseph oculos, vir apostolicus,- vidit Beniamin, fratrem suum uterinum, Christum. Commota sunt viscera eius etc.

Qui vident experimentaliter: Maiestatem condescendentem; Lucae secundo : Videamus hoc verbum , quod factum est, quod Dominus ostendit nobis. - Claritatem supersplendentem: Ioannis primo: Vidimus gloriam eius, gloriam quasi Unigeniti a Patre, plenum gratiae et veritatis. - Suavitatem reficientem; Psalmus: Gustate et videte, quoniam suavis est Dominus. - Sanctitatem aedificantem; Ecclesiastici quadragesimo tertio : Vide arcum et benedic eum qui fecit illum; valde speciosus est in splendore suo. Gyrauit caelum in circuitu gloriae suae, manus Excelsi aperuerunt illum.

II. Quae vos videtis: per industriam rationis et fidei assensum: Exodi tertio : Vadam et videbo

visionem hanc magnam, quare non comburatur rubus. - Per munditiam cordis et intellectus donum: Matthaei quinto : Beati mundo corde, quoniam ipsi Deum videbunt. - Per laetitiam mentis ei fervens desiderium: Ioannis duodecimo: Dixerunt illi gentiles Philippo: Domine, volumus Iesum videre . - Per gratiam Spiritus sancti et sapientiae gustum: Psalmus : Vacate et videte, quoniam ego sum Deus etc.

Dico enim vobis, quod multi, probi et Religiosi, voluerunt videre quae vos videtis, et non viderunt, et audire quae auditis, et non audierunt . Audierunt autem Apostoli Verbum incarnatum: ipsum corde sentiendo summe harmonicum per Scripturarum veritatem: Proverbiorum octavo: Beatus homo, qui audit me etc.

Odorando summe aromaticum per contemplationum aviditatem: Ecclesiastici quadragesimo octavo : Beati sunt, qui te viderunt et in amicitia tua decorati sunt.

Degustando summe mellifluum per unctionum suavitatem; Iob quarto: Vocem quasi aurae lenis audivi.

Admirando summe pulcherrimum per desideriorum multiformitatem: Psalmus: Audiam, quid loquatur in me Dominus Deus.