QUAESTIO V.

Utrum unum et multa opponantur contrarie vel aliter 1

Aphrodis. hic num. 9. S. Thomas Itet. 4. Albertus Magnus tract. 9. cap. 1. Aegidius hic quaest. 5. Flandria quaest. 5. art. 1. Antonius Andr. hic quaest. 2. Suarez disp. 5, sect. 6. Fons. cap. 4. littera A.

Videtur quod non contrarie, quia contrarietas est oppositio secundum formam, sed pars non habet formam distinctam a toto ; cum igitur unum sit pars multitudinis, non erunt contraria.

Item, unum contrariorum non constituit alterum, sed unum constituit multum ; igitur, etc.

Item, si duo ita se habeant quod alterum eorum dicatur de quolibet, et quod tertium convertatur cum uno eorum, oppositum tertii non erit diversum ab opposito primi; sed ens et non ens ita se habent, quod alterum dicitur de quolibet, et unum convertitur cum ente: ergo multum erit contentum sub non ente, et per consequens opponitur contradictorie, et non contrarie.

Item, unum etmultum opponuntur, sicut divisio et indivisio, sed ista opponuntur privative: igitur unum et multa.

Item, unum se habet ad multum, sicut mensura ad mensuratum, sed ista opponuntur relative; ergo, etc.

Oppositum dicit Philosophus.